Read Zou PAUNAH 15 Bible Online

PAUNAH 15 - Zou bible

PAUNAH 15

¹Kamnem a dawnna in thangpaina damsah a, kamkhauh in lungthahna a sosah hi.

²Mipilte’ kam in theina[52] gen a, mimawte’ kam in motna phulsah hi.

³TOPA’ mit in mun zosie mu a, misie le mipha encien zing hi.

⁴Kamnem in hinna singkung ahi a, kam gilo in lungsim suzan hi.

⁵Mimawte in nu le pate’ thuhilna simmaw bawl a, thuhilna a thupisim mipa pen mi pilvang ahi hi.

⁶Mi thumante’ inn sungah gougil tampi om a, migilote’ hauna in buoina piengsah hi.

⁷Mipilte’ kam in theina thezah hi; mimawte’ lungsim sungah tua bang om lo hi.

⁸Migilote’ biehpiehna in TOPA adingin kidahhuoi a, midihte’ thungetna in ama’ lungkimna ahi hi.

⁹TOPA in migilote’ gamtatna kidahhuoi sa a, ama in dihna lam a del mipa a it hi.

¹⁰Lamkhiel mite adingin thuhilna khauh om a, phawsietna a mudate a si ding uhi.

¹¹TOPA mai-ah Misikhuo le Sietna[53] kipholahin a om hi, tua ahile mihingte’ lungsim bangza-in a kipholah zaw kan lai diei!

¹²Mi simmawte in a kiphawsiet ding a dei sih vua, mipilte kungah amate a pei sih ding uhi.

¹³Lungsim nopna in maitaisah a, lungsim gimna in lungsim suzan hi.

¹⁴Theitelna a nei mipa’ lungsim in pilna sui a, mimawte in motna tawh a kam uh a va uhi.

¹⁵A hin sung tungtawnun mizawngte in hahsatna thuohin, a lungdam mite in a tawntungin pawi a bawl uhi.

¹⁶Gougil tampi nei-a tua tawh lungkham sangin TOPA zatahna tawh themkhat beh nei-a i op hoizaw hi.

¹⁷Kimudana tawh bawngthau’ sa nehna sangin ki-itna a opna munah ante me neh hoizaw hi.

¹⁸A lungtom mite in kihauna piengsah a, a lungduoi mite in kihauna daisah hi.

¹⁹Mi thadate’ lampi lingkungte tawh kidim a, midihte’ lampi pen a phei lam lienpi ahi hi.

²⁰Tapil in a pa lungdamsah a, tamawte in a nute simmaw hi.

²¹Ngaisutna a nei lo mite in motna kipahpi a, thu theitel mipa pen tangtahin gamta hi.

²²Kikupna om lo gelnate kikhiel a, thukuppi tampite tawh a maa a tun uhi.

²³A kilawma dawn theina in koipo lungdamsah a, a kilawm huna thugen bangza tahin hoi ahei!

²⁴Azieh pen mipilte’ hinna lampi in a tunglam peipi to a, tua khu a nei lama om Misikhuo a pel thei nading uh ahi hi.

²⁵TOPA in mi kiphasahte’ inn phelkhepieh a, ama in meigongte’ gamgi keppieh hi.

²⁶Gelna hoi lote TOPA adingin kidahhuoi ahi a, hizongle ama muna-ah kamsiemna zong a siengtho ahi hi.

²⁷A manlopi-a nga nopna ziehin huoihamna in amau’ inn sung buoina piengsah a, hinanle guhgol mudate a hing ding uhi.

²⁸Midihte’ lungsim in bangci dawn ding ci thu lungngai phot a, migilote’ kam in thusie a suokhie hi.

²⁹Migilote kung panin TOPA gamla op a, ama in midihte’ thungetna a za hi.

³⁰Maitaina in lungsim kipahsah a, thutha hoi in pumpi tha thosah hi.

³¹Kithuhilna laigil a thudonte mipilte lahah a teng ding hi.

³²Thuhilna awlmaw lote amau le amau a kisimmaw ahi a, kithuhilna a thupisimte in thu theitelna nga uhi.

³³TOPA zatahna pen pilna sungah kithuhilna hi pai a, patawina masangin kiniemkhiehna a pei hi.