Read Zou PAUNAH 17 Bible Online

PAUNAH 17 - Zou bible

PAUNAH 17

¹Kihauna tawh innsung dima pawi an nehna sangin lungnopna tawh an gumgaw halno khat nehna hoizaw hi.

²Pilvang tahin a gamta sila khat in zumhuoi tahin a gamta tapa uh a, innkuon sung mite khat bangin ama in gamh a tang ding hi.

³Sia a kihuontuina-ah ngun kihalin, meikhuh sungah kham kisittel a, ahi vangin TOPA in mihing lungtang sittel hi.

⁴Sietna a bawl mite in kamham gilo a ngai vua, zuouthu gen mipa in thu ginalo kigente a thupisim hi.

⁵Mizawngte a thusim lote in amau a Bawlpa simmaw ahi uhi; midangte’ tuosietna-ah a thangphate pen dan thuoh loin a om sih ding uhi.

⁶Tuute pen tehsiete’ mang lukhu ahi a, nu le pate pen tate’ angtanna ahi hi.

⁷Thuhoi genna pen mimawte adingin kilawm lo hi; zuouthu genna pen gam-uhte[55] adingin kilawm lo kan lai hi.

⁸Guhgol pen a piete’ muna-ah suong-ai tawh kibang a, a kihei napo vuah a daupei uhi.

⁹Mi’ khielna a maisah pa in lawm le guol hau a, mi tawh a kisel den pa in lawm le guol a tan ding hi.

¹⁰Mimaw khat zavei i sat sangin thu khinkhai thei khat khatvei i phawsietna pen thuh bunzaw hi.

¹¹Migilote in ledona ding behbeh a sui vua, hinanle amate do dingin kamtai gilo khat kisawl ding hi.

¹²A mottat mimaw khat tawh i kisih sangin a tano kilah pieh vompi tawh kituo ding hoizaw hi.

¹³Thuhoi sietna tawh a thuhkia mipa’ inn sung panin sietna veng ngai lo ding hi.

¹⁴Kihauna kipatna pen tuikuong ke pana a luong tui tawh kibang hi, tua hi a, kihau masanga khawl pai khian ding ahi hi.

¹⁵Migilote dih a tangsah pa le midihte maw a tangsah pa pen TOPA dingin a ni-in kidahhuoi tuoh hi.

¹⁶Sin nopna lungsim a nei lo mimawte’ khut sungah, pilna sin nadingin bang hangin sum ki-ap ding ahei?

¹⁷Lawm le guolte in ei it den a, sanggamte ahile hahsat huna ei thuohpi dinga ang pieng ahi hi.

¹⁸A vengpa ’ leiba a lopieh dingin kikhamin, kamciem piehna pen thu theimaw vai ahi hi.

¹⁹Gamtat khielna a dei pa kihauna dei ahi a, a sangkil a sang lamte pen gu tawn nading sui ahi hi.

²⁰Lungsim kawite nuomsa ngai lo a, zuouthu a gente in hamsietna tuoh uhi.

²¹Tapa maw a neite in lunggimpi a, tapa maw a nei nu le pate lung nuom lo hi.

²²Lungtaina in zatui hoi khat ahi a, lungkiehna in gu le tangte gawtasah hi.

²³Thutang lampi heimang nadingin migilote in guhgol a daplah uhi.

²⁴Thu khinkhai thei pa in pilna en a, mimawte’ mit in leimong dong a en kawikawi hi.

²⁵Ta mawte a pate’ lunggimna ahi a, a hing nu adingin sinkhamna ahi hi.

²⁶Maw nei lo pa tungah lieu tuosah pen hoi lo a, a citahna uh ziehin mi thupite sat huoi lo hi.

²⁷Thugen ki-ip mipa in pilna nei ahi hi; a sip khinkhian mipa zong theitelna nei ahi hi.

²⁸A sip dide mimawte nangawn a pil dingin kingaisun hi; kamkeh loin a op ciengun, thu thei dingin kingaisun hi.