Read Zou PAUNAH 19 Bible Online

PAUNAH 19 - Zou bible

PAUNAH 19

¹Zuouthu gen mimaw pa sangin citahna tawh kalsuon mizawng pa hoizaw hi.

²Theina kici nei lopi-a lunggulna pen hoi lo a, a nawpei mi pa in lam a khiel hi.

³Mi khat’ mottatna in sietna tun a, TOPA tungah a lungthah hi.

⁴Hauna in lawm le guol tampi neisah a, mizawngte, lawm le guol nei loin kinuasie hi.

⁵Zuou teci pang pa dan thuoh loin om lo ding a, zuou gen mipa suohta lo ding hi.

⁶Mi tampi in uliente’ maipha a sui vua, letsong pie pa pen mi zosie’ lawm ahi hi.

⁷Mizawngte pen a tanaute nangawn in muda ahile, a lawm a guolte in bangza-in pel zaw kan lai ding ahei! Amate hlanin a del ciengin tua sungah amate a om nawn sih hi.[59]

⁸Pilna suipa ahile ama le ama ki-it ahi a, thutelna nei ding pen daupei nading ahi hi.

⁹Zuou teci a pang pa dan thuoh loin om lo ding a, zuouthu gente zong kisie ding uhi.

¹⁰Mimawte a noptat ding uh kilawm lo a, sila khat in uliente a uh ding kilawm lozaw lai hi.

¹¹Thu ngaisun siemte a lung uh duoi a, khielna khat kimumaw bawl pen vangneina ahi hi.

¹²Kumpipa’ lungthahna pen humpinelkai’ hawh tawh kibang a, ahi vangin ama’ maipha ahile lopa tunga a kie daitui tawh kibang hi.

¹³Tapa maw pen a pa adingin kisietna hi a, mi tawh a kihauhat zi pen a theu thei lo guomal kie tawh kibang hi.

¹⁴Inn le neisate pen nu le pa tung pana kiluo hi a, zi pil ahile TOPA tung pan ahi hi.

¹⁵Thasietna in kimut dusah a, a thada mipa a gilkiel ding hi.

¹⁶Thupieh a zuite a hing ding uhi; a lampi uh a thusim lote si ding uhi.

¹⁷Mizawngte tunga a thusiem poma TOPA a leitawisah ahi a, a kiningcingin kisangsahkia ding hi.

¹⁸Lamet a op hun sungin na tate thuhil in; amau’ kisiet nading lamah na lungsim koi sin.

¹⁹A lungtom mi tatsie pa in mawna dan thuoh ding hi; va hunkhie ta lacin na hutkhiet kiakia kul ding hi.[60]

²⁰Mailam hun ciengin pilna na nga nadingin thukuppina ngai inlen, thuhilna mang in.

²¹Mihing lungsim in gelna tampi nei a, ahizongin TOPA’ ngaisutna beh kip ding hi.

²²Mi khat tungah a deihuoi thu in tahtaina hi a, zuougen mi khat hi ding sangin mizawng khat hi ding hoizaw hi.

²³TOPA zatahna in hinna tahtah ahi hi; tua tawh a kidim mipa nuomtahin khawlin, gimna a thuoh sih ding hi.

²⁴Mi thasiepa in a khut tawh ankuong sawhsuh a, a kam sunga a an tutkia ding nangawn a nuom sih ding hi.

²⁵Mi simmawte sat in; tua hile thuthei lo mipa in theina a nga ding hi. Thuthei mipa phawhsie in, tua hile amate in theina a nga ding uhi.

²⁶A pate tungah tatsie-in a nu a delmangte pen maizumna a piengsah le mindaina a tut tate ahi uhi.

²⁷Ka ta aw, thuhilna na zah thei nadingin thu theinate panin na piel ding khawl in.

²⁸Kimanna a nei lo teci in thutang pen ciemmuina-in nei a, migilote’ kam in khielna valtum hi.

²⁹Mi thusim lote adingin mawsahna a baisa-in om a, satna pen mimawte’ elzang ading ahi hi.