Read Zou PAUNAH 2 Bible Online

PAUNAH 2 - Zou bible

PAUNAH 2

¹Ka ta aw, ka thugente pomin ka thupiehte na sunga na khol leh,

²pilna lamah lunglut tahin bil daw-in, thutelna lamah na lungtang na ngat a,

³thuthuh thei nuomin kiko tahpi-in thutelna nei nuomin na kiko a;

⁴dangka sui bangin sui-in, a kisel gou bangin na sui leh,

⁵tuaci’n nangma in TOPA zatahna na thei ding a, Pasien theina na mu ding hi.

⁶Azieh pen TOPA in pilna ei pie a, ama’ kam panin theina le theitelna ang pei hi.

⁷Ama in thuman mite adingin pilna laigil kholpieh hi; kawbaang lo-a kalsuon mite adingin ama pen kidalna lum ahi hi.

⁸Ama in thutangte’ lampi cingin, ama tunga muonhuoi mite’ lampi kem hi.

⁹Tua hileh thumanna le thutanna, a kilawm le lampi hoi poma na thei ding hi.

¹⁰Azieh pen na lungsim sungah pilna ang lut ding a, theina in na hlagau a lungnuomsah ding hi;

¹¹thu khinkhai theina in nang ang cing ding a, theitelna in ang kem ding hi.

¹²Tuami in gitlona lampi panin nangma ang hunkhie ding a, thulegen mite kung pan le

¹³khuomiel lampi a zawt nadingun thuman lampi a nuasie mite,

¹⁴a sie-a gamtat nuom a sa, gitlo letatna-a a lungkim mite,

¹⁵a lampi uh kawi-in a gamtat sawi mite panin ang kem ding hi.

¹⁶A thangtat[2] numei pan le kamhlum no tawh angkawm numeite pan,

¹⁷a sen lawm ngaih nuasie a, Pasien tawh a kiciemna a mangngil nu kung panin kang hunkhie ding hi;

¹⁸azieh pen tua nu lampi[3] in sina dongah ang pui a, ama’ peina lampi in sina hlim lam ang tun hi;

¹⁹tua nu kunga a pei mite ang kilekia ngai nawn sih vua, amate in hinna lampite zong a ngakia nawn sih uhi.

²⁰Tuaci’n mi hoite’ lampi tawn inlen, a thutang mite’ lampi zui in.

²¹Azieh pen gam sungah thuman mite a teng ding vua, tua sungah mawpeng mite a teng suoh ding uhi;

²²ahi vangin tua gam panin migilote kisumang ding a, tua gam panin misol hatte kiphungkal mang ding hi.