Read Zou PAUNAH 21 Bible Online

PAUNAH 21 - Zou bible

PAUNAH 21

¹Kumpipa’ lungtang pen luitui luong tawh kibang a, TOPA’ khut sungah a om hi; ama in ama’ deideina po-ah a hei kawikawi lel hi.

²A sempa’ muna-ah sepna zosie man a, hizongle TOPA in mite’ lungtang a tawikhai hi.

³TOPA in biehpiehna sangin thuman le thutang sep ding deizaw hi.

⁴A kihisah mittang le a kiphasah lungtang- migilote’ meivah- khu mawna ahi hi.

⁵Nasep thanuomte’ gelna in kiningcinna ei tun valon a, hinanle a dihau nuom poma kitasam ding uhi.

⁶Zuou genna tawh a kinga nei le lamte pen a lengmang tuikhu le sina thang[62] ahi hi.

⁷Migilote a manin a gamtat nuom lo ziehun, a tatsietna un amate kaiphit ding hi.

⁸Mikhielte’ lampi kawilieng a, mi siengthote’ gamtatna a man hi.

⁹Mi tawh a kihau hat zi tawh inn sung khat ah i tenton sangin innkhum zang kiu khatah ten ding hoizaw hi.

¹⁰Migilote’ lungsim in sietna dei a, amau’ muna-ah a vengte in hepina mu kha lo hi.

¹¹Misimmaw khat dan a kipieh ciengin thu thei lote in pil law a, mipilte thu a kihil ciengin a thu theina uh khang semsem hi.

¹²Midih Pa in migilote’ inn kantel a, ama in a kisie dingin migilote a sawnpua hi.

¹³Mizawngte kikona na bil na hum leh nangma na kiko ding a, ang kidawng lo ding hi.

¹⁴Letsong kidappieh in lungthahna daisah hi; kang sunga kipie phuolsel guhgol in sinsona damsah hi.

¹⁵Thutanga na a kisep ciengin midihte adingin kipahna ahi a, ahi vangin sietna a bawlte adingin lungkiehna ahi hi.

¹⁶Thutelna lampi pana vahmang mite pen misite kikhopna-ah a khawl ding uhi.

¹⁷A noptat nuom poma tasam ding a, zu le sathau hai poma hau lo ding hi.

¹⁸Migilote pen midihte adingin kitatna hi a, upna a nei lote pen mi thumante adingin kitatna ma ahi hi.

¹⁹A phunhat le a hangsan zi tawh tenton sangin senel gamgaw-ah teng hit hiet leih hoizaw hi.

²⁰Mipilte’ inn sungah gou manpha omsuoh[63] a, mimawte in tuate a netum pai uhi.

²¹Dihtatna le migitna a del poma in hinna[64] le patawina a mu ding uhi.

²²Galhangte tenna khuopi sim dingin mipil khat kuonto a, amau’ muon mama khuo kulpi a satguoipieh hi.

²³Kam le leii kep siemna in buoina tawh ei kipelsah hi.

²⁴Mi kiphasah, mi kihisah pa pen “Misimmaw pa” kici a, ki-uongsahna tawh a gamta hi.

²⁵Mi thadate’ khut in na sem nuom lo ahi ziehin mi thada pa’ deigawna in sina a piengsah hi.

²⁶Migilote in sunthapai-in a deigaw[65] mielmuol vua, midihte ahi uleh hen kici nei loin a pie uhi.

²⁷Migilote’ biehpiehna kidah a huoi hi; ngimna hoi lo tawh a tawi ciengun kidahhuoi zaw lai hi.

²⁸Zuouthu tecipang pa kisie ding a, thungai siem pa in guolzo tahin teci pang ding hi.

²⁹Migilote in hansan mel a puo a, mi thumante in a pei nading ngaisun[66] uhi.

³⁰TOPA langkhatah pilna, thutheina, kithumopnate kimanna nei lo hi.

³¹Galsim ni-a zah dingin sakol a baisa-in kikoi a, hizongle galzawna pen TOPA hang ahi hi.