Read Zou PAUNAH 23 Bible Online

PAUNAH 23 - Zou bible

PAUNAH 23

¹Gam-uhte tawh an ne dinga na toton ciengin na mai-ah bang[69] om ci hoitahin en inlen,

²anhai mi na hi leh na lawl-ah namta khat koi in.

³Kisolna an ahi ziehin gam-uhpa’[70] antuite dugaw sin.

⁴Hau nop manin gimpipi-in nasem sin; pilvangin khawl hun thei in.

⁵Na mit mu sungin tuate tawpmang thei lel hi; azieh pen tua in thakhatin muvanlai bangin, a hla zapin vantung lamah a lengto ta hi.

⁶Mi cilpawngte’ an nehpieh sin; a an tuite uzong dugawpieh sin;

⁷azieh pen tuate khu na dangtawng ang sun samzamte tawh kibang ahi hi.[71] Amate in na kungah, “An ne inlen tui dawn in!” ang ci vangun, a lungsim tahpi uh hi lo hi.

⁸Halkhat na neh sunsun na luokia ding a, na kamsiem gen teng maimang ding hi.

⁹Mimaw pa’ zahna-ah thugen sin, na pil thugen teng ang simmawpieh lel ding hi.

¹⁰Tanglai kigi suongte khin sinlen, pa nei lote’ logam kehpieh sin.

¹¹Azieh pen amau’ tanpa thahat a, na langkhat vuah amate panpi ding hi.

¹²Kithuhilna-ah na lungsim ngat inlen, theina thu lamah na bil daw in.

¹³Na tate thuhil ding kidiem sin; ciengduoi tawh sat nan lacin si lo ding hi.

¹⁴Amate ciengduoi tawh sat lacin, Misikhuo panin a hinna uh na hunkhie ding hi.

¹⁵Ka ta aw, na lungsim a pil leh ka lungdam mama ding hi.

¹⁶Na kam in thuman a gen ciengin ka hlagau a kipah ding hi.

¹⁷Na lungtang in mawneite engsah sinlen, TOPA zatahna zom peisuoh in.

¹⁸Mai lam hun khat pel lo-in om tahpi a, na kinepna a mawhna-in maimang lo ding hi.

¹⁹Ka ta aw, ka thugen za-in pil inlen, tua lampi-ah na lungsim hei in.

²⁰Zuhaite lahah om sinlen, sahaite lahah zong om sin.

²¹Azieh pen zukhamte le anhaite zawng ding a, a kimutdu ziehun puonsie beh sil ding uhi.

²²Na pienna na pa thu’ ngai inlen, na nu a vuoi ciengin simmaw sin.

²³Thuman thutah lei inlen zua sin; pilna, kithuhilna, le thu theitelna lei in.

²⁴Midihte’ pa a lungdam mama ding hi; tapa pil a nei pa zong a tapa tungah lungdam ding hi.

²⁵Na nu le na pa lungdamsah in; na pienna na nu kipahsah in.

²⁶Ka ta aw, na lungtang ei pie inlen, ka lampite mitsuon[72] gige in.

²⁷Numei pahtat khat pen dum thuh tawh kibang hi; angkawm numei khat pen a kuocih tuikhuh tawh kibang hi.

²⁸Ama in misuom pa bangin buhdap a, upna a nei lo mi pungsah hi.

²⁹Koi in gimna thuoh ahei? Koi in dan thuoh ahei? Koi kisel ahei? Koi phunphun ahei? A thu om lopi-in koi liem ahei? Koi a mit san giagua ahei?

³⁰Zu ne-a a tokhote, zucia a ciem nuomte ahi hi.

³¹Hai sunga a phuon lihleh, lawl sunga a tumsuh vahiau, a san pimpem lengga zu etin zong nei vet sin.

³²Tua in a tawpna-ah gul bangin mi tu a, gul gunei in mi a tuh bang ahi hi.

³³Na mit in na lamdangte na mu ding a, na lungsim in letatna thu vive a gen ding hi.

³⁴Tuipi laizanga a lum mi tawh na kibang ding a, tembaw khuom dawna a lum mi tawh na kibang ding hi.[73]

³⁵“Ei vuoh vangun ka liem sih hi; ei sat vangun ka phawh kha sih hi. Bang hun ciengin ka khanglo diei? ka dawn ding zu suikia vang,” na ci ding hi.[74]