Read Zou PAUNAH 25 Bible Online

PAUNAH 25 - Zou bible

PAUNAH 25

¹Tam teng pen Judah Kumpipa Hezekiah’ uliente in a teikhiet Solomon’ paunahte ahi hi.

²Thu ipna pen Pasien’ minthanna hi a, thu kankhiet pen kumpite’ minthanna ahi hi.

³Vantungte sangin leitung a thuh zaw ma bangin kumpite’ lungsim zong thuhin kikan zo lo hi.

⁴Ngun panin a eh la dawh leih ngunkheng pa adingin vanzah khat suoh hi.

⁵Kumpipa’ mai panin migilote la dawh leih dihna sungah a kumpi topha kip ding hi.

⁶Kumpipa mai-ah kithupisah sinlen, miliente’ dinna munah ding kha sin;

⁷azieh pen mithupi khat’ mai-a ei kiniemkoi sangin, “Tanah hing to ta’n,” ei kici ding hoizaw hi. Na mit in a mu popo

⁸thukhen zum tut paipai sin; azieh pen[77] na vengte in hing maizumsah leh a tawpna-ah nang in bang na law ta diei?

⁹Na vengpa beh ma tawh thu kisel inlen, midangte’ thusim pholah sin;

¹⁰tua hile ang zuidap khat in ang maizumsah ding a, na minsietna a tawp ngai sih ding hi.

¹¹A kilawm hunin kamteng khat genkhiet pen ngunpeh tunga kham apple kisuong tawh kibang hi.

¹²A sang thei mipa adingin pilna tawh mi phawsietna pen kham bilba ahi sihle kham kizepna tawh kibang hi.

¹³Kamtai muonhuoite pen a sawlte adingin anlah hun cienga vuakhal vot tawh kibang a, tuate in a pute’ lungsim thasuosah hi;

¹⁴letsong a pieh ngai lopi a kisielpipa pen guo a zusah lo meiite le huipite tawh kibang hi.

¹⁵Lungduoina tawh gam-uhpa kithuzaw thei a, kam nem in guletangte hliehtawng zo hi.

¹⁶Khuoizu na mu leh na khamkhop za beh ne in, tua hi sihle na tam neh sengin na luo kha ding hi.

¹⁷Na vengpa’ inn ah haw mun seng sin, na haw mun leh na vengpa in hing cimtahin hing muda ding hi.

¹⁸A vengpa’ langkhatah a man lo teci a pang pa pen phawhbul, namsau, ahi sihle thal hiemte tawh kibang hi.

¹⁹Hahsat hunin a zuoutat mi khat i muon khah pen hana khat, ahi sihle khelbai khat tawh kibang hi.

²⁰Mi lunggim khat kunga lasa pa pen liemma[78] tunga lengga tuithua sunsuh tawh kibang hi. Puonsil lahah a om nget bang ahi sihle sing lahah a om lungpuh tawh kibang a, dana in mihingte’ lungtang hlaiguoi hi.[79]

²¹Na galte a gilkiel leh a neh ding an pie inlen, a dangta uleh a dawn ding tui pie in;

²²azieh pen tua bang bawl lacin amau’ lu tungah meikamsa a sungsuh na hi ta ding a, TOPA in thaman ang pie ding hi.

²³Leilu lam hui in guo zusah a, mi sutuo thei leii in lungthah mel puo hi.

²⁴Mi tawh kihau hat zi tawh inn khat sunga tenton sangin innkhum vum kiu khata ten hoizaw hi.

²⁵Khuol gamlapi pana thuhoi zahna pen a dangta mi khat in tuivot tui a sah tawh kibang hi.

²⁶Mi thumante in migilote a zuikhah pen tuinah buon le tuikhuh nieh tawh kibang hi.

²⁷Khuoizu tam neh seng ding hoi lo a, mi ei patawi ding hasui zong hoi lo hi.

²⁸Ama le ama a ki-uh zo lo mipa pen kulpi nei lo, a kulpi a cimzan khuopi tawh kibang hi.