Read Zou PAUNAH 26 Bible Online

PAUNAH 26 - Zou bible

PAUNAH 26

¹Khal lai-a vuakie le anlah huna guozuh bangin mimawte adingin patawina kilawm lo hi.

²A thu om lopi-a samsietna pen tupna a nei lo gitta hon leng bang le a leng kawikawi sielpaleng tawh kibang hi.

³Sakol sat nadingin khaupum kisamin, laa adingin kamkaih kisam a, mimawte elduong sat nadingin ciengduoi kisam hi.

⁴Mimawte a motna tawh kizui-in dawng sin, na dawn leh nang zong a maw na hi ta ding hi.

⁵Mimawte a motna tawh kizui-in dawng in, tua hi sihle amau’ mit-ah a pil kisa thei ding uhi.

⁶Mimaw khat kamtai-a sawlna pen ama’ keng a sattan, tatsietna tui dawn pa tawh kibang hi.

⁷Khelbai pa’ keng a kimawh khai bangin mimawte’ kama paunah kigen pen kimanna nei lo hi.

⁸Mimawte patawi pen saili kuong sunga sailungtang khicip tawh kibang hi.

⁹Mimaw khat’ kam pana paunah thuhilna pen zukham pa’ khuta a gieh den ling tawh kibang hi.

¹⁰Mimaw a tuokhah khatpo, ahi sihle zukham khatpo tha a ciel pa pen mi zosie a ban liemsah thalkap pa tawh kibang hi.[80]

¹¹Ui in a luoh a nehkia bangin mimaw pa zong a mottat kia zel hi.

¹²A muna vuah pil a kisa mi na mu ei mah? Amate sangin mimawte adingin lametna omzaw lai hi.

¹³Mi thasiepa in, “Lampi-ah humpi om! Gawldung teng ah humpi om!” ci hi.

¹⁴A kikhaina kawmpeh tungah kotpi a kihei bangin, mi thasiepa a lupna tungah kihei kawikawi hi.

¹⁵Mi thasiepa in ama’ khut tawh ankuong sawhsuhin, a kam sunga a tutkia ding pen gim a kisa mama hi.

¹⁶A kilawm a kituoha thu a dawng thei mi sagi sangin mimaw khat ama’ kimuna-ah pil kisazaw hi.

¹⁷Midangte’ kihauna-ah a kikumthaw pa pen ui vahmuong khat a bila a kai kawikawi mi pawlkhat tawh kibang hi.

¹⁸Si theina singkhuo-am le thaltang mot kap mimawpa le

¹⁹a vengpa solin, “Ka ciemmuina hi bo!” a ci pa a kibang giap hi.

²⁰Singkhuo a op sih leh mei mit a, mi gensietna a op lona munah kihauna veng hi.

²¹Meihol in mei amsahin singkhuo in mei a kuonsah bangin mi tawh, kihauhat pa in kiselna kuontaw hi.

²²Gensietna kamteng pen antui mama tawh kibang a, mihing’ pumpi sungtawngah tuate a tumsuh pai hi.

²³Lungsim gilo napi a kamzol[81] dihdehte pen cim[82] kizut leibeel tawh kibang hi.

²⁴Galte in lungsim tah gen loin amau’ sungah mi sol nopna beh a om hi;

²⁵a lungsim sungah a huothuoi thu sagi tah kiphuol ahi ziehin, galpa khat in kam nem tawh ang hopi ciengin um malmal sin;

²⁶a ngianku tawh mudana phuol nanle mi hon lahah galpa’ gitlona kipholah veve ding hi.

²⁷Dum to poma tua sung ma-ah kiesuh ding a, suongtum lia poma ama tung ma-ah tua suongtum a tukia ding hi.

²⁸Zuouthu genna leii in a solsa mite muda a, mipawhna kam in sietna piengsah hi.