Read Zou PAUNAH 27 Bible Online

PAUNAH 27 - Zou bible

PAUNAH 27

¹Zing cieng hun adingin kimasiel sin, azieh pen ni khat in bang hing piengsah ding ci na thei sih hi.

²Nangma’ kam tawh kiphattawm sinlen, midang in kiphatsah zaw in. Nangma’ kam tawh hi loin thei lo mi khat in hing genphazaw heh.

³Suongtum gih a, senel zong gih hi, hizongle tua tegel sangin mimawte’ lungthahna gihzaw lai hi.

⁴Thangpaina pen siehuoi a, lungthahna in mi valtum thei hi.

⁵Phuolsel itna sangin langtang phawsietna hoizaw hi.

⁶I guolte’ ei liemsahna pen ei deisahna uh ahi a, galte khat’ ei biengtawp pen ei lebawlna ahi bo hi.

⁷A gilva seng mipa in khuoizu du nawn lo a, a gilkiel mipa in a kha nangawn hlumsa hi.

⁸Inn pana a vahmang mipa pen a bu sung pana a lengmang va tawh kibang hi.

⁹Sathau namtui le panamtui in lungsim nuomsah a, lungkham buoinate in mihing' lungsim kehkhesah hi.[83]

¹⁰Nangma’ lawm le na pa’ lawm le guolte taisan sin; na tuosiet ni ciengin na sanggamte’ inn ah haw sin. A gamla-a om sanggamte sangin a nai-a om innveng khat hoizaw hi.

¹¹Ka ta aw, pil inlen ei simmaw poma ka dawn thei nadingin ei lung nuomsah in.

¹²Mipilte in a zauhuoina mu-in a kiphuol pai uhi; mimawte ahile a peisuoh vua, gimna a thuoh uhi.

¹³Mi khat in gelta pa’ leiba lopieh nadinga a pieh a khapna puon la inlen, gamdang mite[84] tungah pieh dinga a kamciemsa tua khapna van matpieh in.

¹⁴Koipo in zingmawng thobai-in awging tawh a innvengpa thupha a pieh pen samsietna-in kingaisun ding hi.

¹⁵Mi tawh a kihau hat zi pen tualai-a a theu thei lo guociin tawh kibang hi;

¹⁶tua nu kham ding pen hui i kham tawh kibang a, ahi sihle zietlam khuta sathau i ham tawh kibang ahi hi.[85]

¹⁷Sia in sia ma tat hiem thei a, mi khat in midang khat pilsah thei hi.[86]

¹⁸Theikung a cingte in a ga ne ding a, a pupa kem poma kipatawi ding hi.

¹⁹Tui in maitang a lensawn bangin mihing khat’ lungsim in midang khat a lengsawnkia hi.

²⁰Misikhuo le Sietna[87] lungkim ngai lo a, mihing’ mittang zong lungkim ngai lo hi.

²¹Sia kihuontuina-ah ngun zong kihalin, meikhuh sungah kham kize-et a, phatna tawh mihing khat kisittel hi.

²²Mimaw khat pen antang tawh sum sungah suh tawh gawitha nan lacin, a motna theu tuon lo ding hi.

²³Na tuuhonte’ opdan thei siem inlen, na bawnghonte limtahin kem in;

²⁴azieh pen hauna a kip zing sih a, kumpi lukhu zong khang tawntungin kip lo hi.

²⁵Lopate a ki-at ciengin a tha ang suongkia a, muoltunga lohingte ki-atin a kikhol ciengin,

²⁶tuute in na puon ding hing sihin, na keelte in lo cing khat’ man ang pie ding hi;

²⁷nangma’ neh ding, na innkuonpite neh ding le na nasem numeite na vah nadingin, keel nawite a kicingin ang om ding hi.