Read Zou PAUNAH 29 Bible Online

PAUNAH 29 - Zou bible

PAUNAH 29

¹Kiphawhphawh nanle a lungkhau paupaute damsah zawh lo za dongin kisie ding uhi.

²Midihte a vaihawm ciengin mipite lungdam hi; migilote a vaihawm ciengin mipite genthei-in tau uhi.

³Pilna a dei tapa in a nu le a pa lungdamsah a, numei pahtatte tawh a kigop mipa in a neisa teng mawhmai sah hi.

⁴Kumpipa in thutang tawh a gam kipsah a, sum don hat kumpipa in a gam susie hi.

⁵A vengpa a maitang phat poma a vengpa, ama' kengah a awh thei nadinga a thangsiena ahi hi.

⁶A tatkhielna ziehun migilote thangah awh a, midihte in ahile lungdamin la sa uhi.

⁷Midihte in mizawngte’ nga ding lawm teng a thei uhi; migilote in tua bang theitelna a nei sih uhi.

⁸Mi simmawte in khuopi khat a haltum vua, mipilte in thangpaina a daisah uhi.

⁹Mipil khat le mimaw khat zumah a kiheh leh kihosietna le kiselphona veng thei lo hi.

¹⁰Sisan a suo mite in genbanglo mite muda a, amate in midihte tha dingin a sui uhi.

¹¹Mimaw pa in a lungthahna pulah sieng a, mipil pa dai tahin ki-ip hi.

¹²Gam-uh pa khat in zuouthu po a tahsan leh, ama’ uliente zosie zong a gilo pai ding uhi.

¹³Mizawng pa le mi bawlsie pa a kibahna tami ahi hi: TOPA in a ni gelin a mit uh a vahsah tuoh hi.

¹⁴Kumpipa in mizawngte tungah mantahin thu a khen leh, ama’ kumpi topha kip tawntung ding hi.

¹⁵Ciengduoi le kiphaw kisapna in pilna ei pie a, bangma awlmaw lo naupang in a nu maizumsah hi.

¹⁶Migilote in thu a nei ciengin tawnkhielna khang semsem a, midihte in amau’ pua dan a en ding uhi.

¹⁷Na tate thuhilin sam in, tua hile amate in toidamna ang pie ding hi; amate in na lung zong ang nuomsah ding uhi.

¹⁸Mukholna a op lona munah mipite thangtat a, thukham a zuite pen mi nuomsa ahi uhi.

¹⁹Nasemte, kam maimai tawh kibawlpha thei lo hi, azieh pen amate in thu tel nan ule a thupisim sih ding uhi.

²⁰A phengham mi na mu ngai ei mah? Tua pa sangin mimaw khat ading lametna omzaw lai hi.

²¹A neu lai pana a kihawmthaw bawl sila pa in a tawpna lamah sietna a tut ding hi.[91]

²²A lungthah mi khat in kihauna piengsah a, mi lungtom khat in khielna tampi piengsah hi.

²³Mi khat’ kihisahna in ama niemkhieh ding a, lungsim kiniemkhieh mi in patawina nga ding hi.

²⁴Guta tawh kigop pa pen a hinna muda ahi a, ama in mite’ samsietna a zah vangin bangma gen lo hi.

²⁵Midangte[92] giinna in thang a kam a, TOPA a muong mipa a lungmuong hi.

²⁶Mi tampite in gam-uhpa’ maipha sui a, hinanle TOPA kung panin mi khat in thutang nga hi.

²⁷Midihlote in midihte huo a, migilote in zong mi thumante a huo uhi.