Read Zou PAUNAH 30 Bible Online

PAUNAH 30 - Zou bible

PAUNAH 30

¹Jakeh’ thusuo kammalte ahi hi. Mipa in tam bangin gen hi: Pasien aw, kei ka gim a, Pasien aw, ka gim hi. Bangci zaw thei ding ka hei?[93]

²Mihing buong dingin ka nah mot mama hi; mihing thutel theina ka nei vawt sih hi.

³Pilna ka na sin kha sih a, siengtho pa[94] thu zong ka na thei sih hi.

⁴Vantungah koi ka to-in kumsuhkia ahei? A khutkuoh sunga hui a hum thei koi ahei? A puonkulah tuipi a tun thei koi ahei? Leitung mong zosie a phutkip koi ahei? Tua pa’ min bang ahei? Tua pa’ tapa a min bang ahei? Nang na thei valon hi!

⁵Pasien’ thugen zosie in a manna lahtel hi; ama a belte adingin kidalna lum ahi hi.

⁶Ama’ kammalte belap sin, na belap leh ama in ang phawhsie ding a, mizuou na hi lam ang kimu ding hi.

⁷Nangma kungah thu ni kang ngen hi; ka si masangin tua tegel ei niel sin:

⁸Zuou genna le mi solna panin a gamlapi-ah ei hemkhie in; ei hausah seng sinlen, lah ei zawngsah seng sin; ka kisap za lien an tawh ei vah in.

⁹Hau seng leng nangma kang niel ding a, “TOPA kici koi ahei? kang ci kha ding hi; zawng seng leng lah mi’ na guhpiehin ka Pasien’ min kang daisah kha ding hi.

¹⁰A pupa kungah nasem khat mindaisah sin, na gensiet leh a nasempa in nang hing samsie-in ang kimawsah ding hi.

¹¹A pate samsie-in a nute thupha a pie lo mi a om hi.

¹²Amate siengtho loin bua mama napi amau’ muna-ah sieng a kisa mi a om hi.

¹³A kithupisah sengin van lamah sangda to-in a mitkhu mul a tozut mi a om hi!

¹⁴A ha uh namsau tawh a kibang, gam sunga mizawngte a netum ding le, mihingte lahah micimawte a valtum dingin, a ha uh namta tawh a kibang mi a om hi.

¹⁵Vot in tanu ni nei a; “Ei pie in, ei pie in, ci-in a kiko uhi. A lungkim thei lo sil thum om hi; sil lite in, “Pha ta” a ci ngai sih uhi:

¹⁶Misikhuo,[95] a ciing naubu, a dangta zing leitang, le “Pha ta” a ci ngai lo meikuong ahi uhi.[96]

¹⁷A pa simmaw bawlin a mitte phen a, a nu thu mang loin a motbawl mipa pen kuom sunga va-ahte in a mittang kheipieh ding a, langtate in a sa a ne ding hi.

¹⁸Lamdang ka sah mama sil thum a om hi; ka thei lo sil li a om hi:

¹⁹Vanlai zawlah muvanlai lenna lampi, suong tunga gul peina lampi, tuipi vumte tunga tembaw peina lampi, le nungah tangvalte peina lampite ahi hi.

²⁰Angkawmnu’ gamtat zie tami ahi hi: Tua nu in angkawmin kisil sieng a, ama in, “Khielna bangma ka bawl sih hi,” ci hi.

²¹Leitung kilingsah sil thum om a, tua in a thuoh zo lo sil li om hi. Tuate in:

²²Sila khat kumpi a suo cieng, mimaw khat in an a kham cieng;

²³koima’ dei lo numei khat in pasal a nei cieng, nasem numei khat in a pinu’ za a suon cieng, ci teng ahi hi.

²⁴Leitungah neu mama napi a pil mama sil li a om hi:

²⁵Mesite a tha uh hat lo napi khal sungin a neh ding an a khol uhi;

²⁶Ngalvangte zong hat lo napi suongkawmah a kuo ding bawl uhi;

²⁷kauphete in kumpi nei lo napi a honhonin a unpi-un a pei valiei uhi.

²⁸Innlawite[97] khut tawh kiman zo lel napi kumpite’ inn sungah a kimu thei giap hi.

²⁹A kalsuondan uh a pikuon thum om a, a kalsuondan uh a thupi suo li a om hi:

³⁰Gamsate lahah a thahat pen, koima’ mai-ah a nuakin lo humpi;

³¹A kihisah pei aahlui, le keeltang, a mite’ mai-ah[98] a uongpie kumpipa ahi hi.

³²Na mot ziehin nang le nang kitawisangin, ahi sihle thusie bawl ding na sawm ngai leh, na khut tawh na kam hum in.

³³Bangzieh ahei cile bawngnawi lawhlawh leih bawngnawi khal hing suoh a, i nahkuo nah nuoi leih a si a suo ma bangin, i lungthah ciengin kihauna a pieng hi.