Read Zou PAUNAH 31 Bible Online

PAUNAH 31 - Zou bible

PAUNAH 31

¹A nu in Kumpi Lemuel tunga a thugente ahi hi:

²Hi lo hi, ka tapa aw! Hi lo hi, ka sunga pieng ka tapa aw! Hi lo hi, ka kiciemna ka tapa aw!

³Numeite tungah na thatang teng zang sinlen, na lampi-ah kumpite a susie mite lutsah sin.

⁴Lemuel aw, kumpite pen zu dawn ding ahi sih a, gam-uhte zong zucia-te dugaw ding ahi sih hi.

⁵Tua hi mawh leh zu dawnin a thu khensate uh a mangngil ta ding vua, migentheite mite nga dinga kilawmte a leheipieh ta ding uhi.

⁶A mangthai ding mipa zucia pie inlen, a lungkham mama mite zu pie in.

⁷Amate zu dawnsahin a zawn lam mangngilsah in, a lungkhamna uh phawhsah nawn sin.

⁸Thu a gen thei lote tangin genpieh inlen, micimawte’ hamphat nadingin genpieh in.

⁹Amate ading thu genin mantahin thukhen inlen, a zawng micimawte hamphatna ngasah in.

¹⁰Koi in zi hoi mu zo ding ahei? Suongmanpha sangin manhamzaw tham hi.

¹¹A pasal in ama muong mama a, ama’ vangin a pasal a tasam ngai sih ding hi.

¹²Ama in khan tawntungin a pasal tungah sil hoi bawl a, a siet nading bawl lo hi.

¹³Ama in samul le khau sui a, thanuom tahin a khut tawh na sem hi.

¹⁴Ama in sumbawlte’ tembaw bangin gamlapi panin a an ding a tut hi.

¹⁵Khuomiel lahpi-ah tho-in a innkuonpite neh ding an a bawlpieh a, a nasem numeite’ sep dingte a vaihawmpieh hi.

¹⁶Ama in logam khat lei sawmin a lei pai hi; ama in a thalawsa sum tawh lengga lo khat a bawl hi.

¹⁷Ama in nasep hakatin a nih singten a, a ban tegel a khausah hi.

¹⁸Ama in a sumbawlna a met lam thei a, zankim zankhangin a meivah mit ngai lo hi.

¹⁹Ama in a khut tawh muizom a, a khut tawh siem gan hi.

²⁰Mizawngte tungah a khut zah a, a khut tawh tasam mite a zam phei hi.

²¹A innkuonpi zosie puonlum a guon zo ziehin vua a kieh vangin a innkuonpite dingin lunghimaw lo hi.

²²Ama in a lupna tuom dingte bawl a, a puon pen saihadiel puon le puon ausante ahi hi.

²³Khuopi tunkota om upa vaihawmte lahah a pasal a to ciengin mite in ama a theikim uhi.

²⁴Ama in saihadiel puon khui-in tuate a zua hi; ama in kawnggate bawlin sumbawlte a puoh hi.

²⁵Ama’ kivonna puon pen hatna le zatahhuoina ahi a, ama in ang tung ding hunte a nuisan zieu lel hi.

²⁶Ama in pilna tawh a kam kah a, ama in a leii panin khuotuo thuhilna dan a gen hi.

²⁷Ama in a innsung vaite hoitahin van a, thadana an a ne sih hi.

²⁸A tate tho-in ama pen mi nuomsa nu a ci vua, a pasal in zong ama nu a pahta mama a:

²⁹“Numei tampite in hoitahin semzo tama leh, nang in amahaw zosie na leh zo hi,” a ci hi.

³⁰Ngaibanna pen kisolna hi lel a, meihoina zong a mawhnapi hi lel hi. Hinanle TOPA a zatah numei pen a phattah ahi hi.

³¹A khut tawh a sepna ga’ satanh pie unlen, mite in a nasepnate ziehin khuopi tunkotah phat ta uheh.