Read Zou PAUNAH 4 Bible Online

PAUNAH 4 - Zou bible

PAUNAH 4

¹Tate aw, na pa uh’ ang thuhilna ngai unlen, thuthuh theina na nga[6] nadingun limtahin ciemte un;

²azieh pen keima in zui ding thuhoite nang kang pie hi. Kang thuhilte mangngil sin.

³Ka pa tawh ka khangmoi lai, ka nu’ angvan tapa khat ka hi lai-in,

⁴ama in thu ei hil a, ka kungah, “Na lungsim in ka thugente tukipsah in; kang thupiehte zui-in hing in.

⁵Pilna sin in; thuthuh zong sin in: Mangngil sinlen, ka kam pana a pusuoh thute panin pielmang sin.

⁶Pilna taisan sin, tua hile ama in nang ang kem ding hi; pilna it in, tua hile ama in nang ang cing ding hi.

⁷Pilna kipatna tam ahi hi: Pilna sui in, adang na nga thei poma sui in, thutel theina kisui in.

⁸Pilna thupisah mama in, tua hile ama in ang lamsang ding hi; ama pom lacin ama in nang ang patawi ding hi.

⁹Ama in na lutungah a etlawm paakuol ang khusah ding hi; ama in na tungah a kilawm kumpi lukhu ang khusa ding hi,” a ci hi.

¹⁰Ka ta aw, na khan kumte a sau nadingin ka thugente ngai inlen sang in.

¹¹Pilna lampi kang hil zo hi; thumanna lampi-ah kang pui zo hi.

¹²Lam na pei ciengin na kalsuonna ang nawngkaisah sih ding hi; Na tai leh zong na kipai sih ding hi.

¹³Ang kithuhilnate tukip in; tuate hlasuo vawt sin; na hin nading ahi ziehin tua khu kepsiem in.

¹⁴Migilote’ lampi ah pei sinlen, sietna bawlte lampi ah zong pei sin.

¹⁵Tua khu pel in; tuanah pei sin. Tua pan kihei-in kansan in.

¹⁶Azieh pen sietna a bawl sih uleh amate a kimuthei sih uhi; mi khat’ pua nading a bawl masangsie a kimu ngim thei sih uhi.

¹⁷Azieh pen amate in gitlona an ne-in, kheltatna zu a dawn uhi.

¹⁸Hinanle thuman mite’ lampi ahile sunkim donga a tang semsem, zingmawng khuovah pan tawh kibang hi.

¹⁹Migilote’ lampi pen khuomiel thuhpi tawh kibang a, a palkhahna sontah uzong amate in a thei sih uhi.

²⁰Ka ta aw, ka thugente lunglut tahin ngai in; ka thugente na bil ei ngat in.

²¹Nangma’ mun panin amate pitsah sin; na lungsim sungah kemcing in.

²²Azieh pen a mute dingin tuate in hinna ahi a, a pumpi zosie vua dingin damna zatui ahi hi.

²³Pilvangin na lungtang kem in, azieh pen tua panin hinna tuisam a pul hi.

²⁴Thukawi genna pai dawh inlen, thulegenna gamla pelh in.

²⁵Na masang lam en inlen, na mailam tangtahin mitsuon in.

²⁶Na zawt lampi tangsah in, tua hile na khuoheina ang kicien ding hi.

²⁷Ziet le vei-ah piel vawt sin; sietna panin na keng hei in.