Read Zou PAUNAH 9 Bible Online

PAUNAH 9 - Zou bible

PAUNAH 9

¹Pilna in a inn lam zo ta a, khuompi sagi sui zo hi.

²A gante go zo-in a zu a pawi a, an neh nading sabuoi zong a pha hi.

³Ama in khuo sung munsang pente panin mi hlan dingin a nasem numeite sawl a,

⁴“No, thu thei lote aw, tanah hing pei un!” ci-in hlanin, thu khentel thei lote kungah,

⁵“Hing pei unlen, ka an ne-in ka zupawisa hing dawn ta un.

⁶Picinlona[27] taisanin nungta unlen, thuthuh theina lampi tawn un,” cisah hi.

⁷Mi simmaw khat thu a hil poma in maizumna nga hi; migilote a phawh poma in liemna nga hi.

⁸A kiphawhsie mi simmaw pa in ang muda bep lel ding hi; mipilte na phawsiet ciengin ang it ding uhi.

⁹Mipilte thuhil[28] in, tua hile amate ang pil semsem ding uhi; midihte thuhil in, tua hile a theina uh ang kibelap ding hi.

¹⁰TOPA zatahna in pilna kipatna ahi a, Siengtho Pa theina in thuthuh theina ahi hi.

¹¹Bangzieh ahei cile keima ziehin na hinkhuo nite ang khang ding a, na khankumte ang kibelap ding hi.

¹²Nang na pil leh nangma dinga a pil na hi hi; pilna na thuse sih leh nang beh in na thuoh ding hi.

¹³Numei mawte a nah ham hi; ama mawlawmin bangma a thei sih hi.

¹⁴Ama’ inn kot zungah to a, khuopi bosang munte tunga a topha tungah to-in,

¹⁵amau’ lampi cieta a pei, tua mun a nawh kha mite hlan a,

¹⁶“No, thu thei lote aw, tanah hing pei un!” ci-in hlanin, thu khentel thei lote kungah,

¹⁷“A kigudap tui hlum deu a, a kidapneh an tui deu hi,” a ci hi.

¹⁸Hinanle amate in tua munah misite[29] a op lam le a thuhna Misikhuo-ah tua nu’ lenglate a op lam a thei sih uhi.