Read Zou THUHILNA 1 Bible Online

THUHILNA 1 - Zou bible

THUHILNA 1

¹Jerusalem-a kumpi a sem David’ tapa Siepa’[1] thugente.

²Siepa in, a mawhnapi, a mawhnapi, na zosie a mawhnapi, ci hi.

³Mite in sun nisa nei-ah gim le tawlin na a sep ziehin bang teng lemlaw nei uh ahei?

⁴Khang khat tawpin khang khat tung a, hinanle leitung a ngaingai bang den hi.

⁵Ni suohin ni tum a, a suona munah kilekia pai hi.

⁶Leitaw lamah hui lang a, leilu lam kimvel hi; a kimvelin hui lang kawikawi a, a lanna ngai ma-ah a lang zel hi.

⁷Luite zosie tuipi sungah luongsuh a, hizongle tuipi a dim tuom sih hi; luite a luonna mun ma ah a luongkia zel uhi.

⁸Sil zosie[2] lunggimhuoi a, mi gen zawh ding hi lo hi; mit in a mucim thei lo a, bil in a zah cim thei lo hi.

⁹Ang pieng dingte pen a piengsate ma hi a, a kisemkia dingte zong a kisemsate ma ahi hi; sun nisa nei-ah a tha bangma om lo hi.

¹⁰“En in, tami a tha hi,’ ci-a gen thei ding na khat beh a om amah? Tamte eihaw masang kum tampi lai-a na omsa ahi ta bo hi.

¹¹Mi masate kiphawh kha nawn lo a, ang pieng lai ding mite zong amate nua-a khangkia dingte in a phawh kha nawn sih ding uhi.

¹²Keima, Siepa in Jerusalem ah Israel kumpipa ka hi lai-in,

¹³leitunga sil kibawl vannuoi pilna tawh sui ding le kantel dingin ka ngaisun hi; Pasien in mihingte tungah tua bang po tawh a kitahla dinga nasep ei guot pen a nuom lo nasep khat ahi hi.

¹⁴Sun nisa nei-a sil kibawl vannuoi ka na mu hi; tuale en in, tuate zosie a mawhnapi a na hi a, huipi[3] nuadel tawh kibang hi.

¹⁵A kawisate kizezang thei lo a, a om lopi kimawh sim thei lo hi.

¹⁶“Pilna sangpi ka nei a, keima’ mai-a Jerusalem vaihawmte zosie sangin ka pilzaw hi; pilna le theina tampi ka sin zo hi,” kei le kei ka kici hi.

¹⁷Tuale pilna, motna le ngolnate ka thei nadingin ka lungsim ka zang a, ahi vangin tam zong khu huipi nuadel bang lel ma ahina ka theikhie hi.

¹⁸Azieh pen pilna a tam leh buoina tam a, theina a khan leh dana zong khang hi.