Read Zou THUHILNA 4 Bible Online

THUHILNA 4 - Zou bible

THUHILNA 4

¹Leitunga kibawlsietna zosie khatvei ka mukia hi. A kibawlsie mite’ hlitui en in, amate a henem ding koima om lo hi! Amate a bawlsie mite in thu nei mama a, a henem ding koima a om sih hi.

²Tuale a sisa mite thu ka ngaisun a, a hinglai mihingte sangin a sisa mite hampha ka sazaw hi;

³ahi vangin tua tegel sangin mihinga a pieng nai lote le leitunga gitlona teng a mu nai lote hoizaw lai hi.

⁴Tua ciengin gimpipi-a nasepna zosie le siemna zosie, mite khatlekhat a ki-enna uh pana ang pieng ahi hi, ci thu ka mu hi. Tam zong a mawhnapi ahi a, huipi nuadel[8] ma tawh kibang lel hi.

⁵Mimawte in a khut a zep vua, amau’ tahsa a netum uhi.

⁶Gimpi-a nasepna le huipi nuadelna tawh a kinga khutdim ni sangin, lungnopna tawh a kinga khutdim khat hoizaw hi.

⁷Leitungah a mawhnapi khat ka mukia hi:

⁸Tapate hile, sanggamte tanute hile a nei lo, a tolten mite ka mu hi; hizongle gimpi-a a nasep uh khawl hun nei loin hauna tawh lungkim hun zong a nei thei ngai sih uhi. “Keima in nopsahna teng taanin koi adinga gimpi-a na ka sep mawh ahei?” ci-in amate a kidong uhi. Tam zong a mawhnapi hi a, a dahuoi nasep khat ahi hi.

⁹Khat sangin ni hoizaw hi, azieh pen ama gel in a nasep gimna ziehun thaman hoitah a nga uhi.

¹⁰Azieh pen ama gel a pua uleh, khat in a khat phongto ding hi; ahi vangin ama tanga ompa pen mi hamsie ahi a, ama a pua khah leh a panpi ding midang a nei sih hi.

¹¹Mi ni lumton leh a khuo uh lum hi; mi khatguoh bangci bangin a khuo lum thei ding ahei?

¹²Mi khat in adang khat zo kha phiel nanle, mi ni in mi khat pen zo hamtang ding hi. Zam thum a kihuol khauhuol tat bai pah lo hi.

¹³Thuhilna a sang nuom nawn lo, vuoi le mot a thuo kumpipa sangin mizawng khangno khat manphazaw hi.

¹⁴Kumpi gam sungah a zawngsa-a suoh hi zongnanle thong sung panin suohta-in kumpi suoh thei hi.

¹⁵Leitunga a vah kawikawi hinna a nei zosie in kumpipa[9] zalaih ding ahi tua[10] khangno pa’ nua a zui uh ka mu hi;

¹⁶ama’ puisa tua mi zosiete sim tal loin a tam uhi. Hinanle ama nua-a a khang mite in ama tungah a lungdam tuon sih ding uhi. Tam zong khu a mawhnapi le huipi nuadel ma tawh kibang hi.