Read Zou THUHILNA 7 Bible Online

THUHILNA 7 - Zou bible

THUHILNA 7

¹Sathau manpha sangin minphatna hoizaw a, suo ni sangin si ni hoizaw hi.

²Pawibawlna inn-a haw sangin dana inna haw hoizaw hi; azieh pen mi zosie dingin a tawpna hi a, tua khu a hing laite’ lungsimah teng den ding hi.

³Nuina sangin dana hoizaw hi; azieh pen da mel puohna in lungsim kipahna piengsah hi.

⁴Dana inn ah mipilte’ lungsim om hi; guolnopna inn ah mimawte’ lungsim om hi.

⁵Mimawte lasah i ngai sangin mipilte ei phawsietna ngai ding hoizaw hi.

⁶Bangzieh ahei cile beeltaw nei- a lingkung kihal ging bangin mimawte nuina ging vapuoh hi; tam zong khu a mawhnapi ahi bo hi.

⁷Bawlsietna in mipilte mawsah a, guhgol nehna in mi lungsim susie hi.

⁸Na khat a kipatna lam sangin a tawpna lam hoizaw hi; kiphatsahna sangin lungduoina hoizaw hi.

⁹Na lung thahsah bai sin, azieh pen mimawte’ awp sungah lungthahna a gieh hi.

¹⁰“Bang dingin tuhun sangin hunlui hoizaw ahei?” ci sin. Azieh pen tam na thudawh khu pilna pana ang pei ahi sih hi.

¹¹Pilna pen gouluo za-in hoi a, nisa a mute adingin hamphatna ahi hi.

¹²Azieh pen pilna tawh kidalna khu sum tawh kidalna bang ahi a, pilna nei a phattuom zawhna pen pilna in ama a neipa hinna pie hi.

¹³Pasien’ nasepna lungngai in; ama in a kawisahte koi in zangsah thei ahei?

¹⁴Cithei hunin kipah inlen, hahsat hunin kingaituo in; mihing in ama’ nua-a a pieng ding thute a thei zo lo nadingin Pasien in citheina le hahsatna tungsah kawikawi hi.

¹⁵A mawhnapi-a ka hin sungin na vannuoi ka mu zo hi; midihte a dihna utawh a na si vua, migilote, a gitlo gamtatna utawh a khan uh na sau hi.

¹⁶Kidihsah seng sinlen, zong kipilsah seng sin; bang dinga nang le nang kisusie ding na hei?

¹⁷Gilo seng sinlen kimawsah seng sin; bang dingin na hun a tun masangin si ding na hei?

¹⁸Adang khat hlasuo tuon loin a khat zong na tuhdet ding hoi hi; azieh pen Pasien zatah mipa ahile a nipi-in lawcing ding hi.

¹⁹Khuopi khat sunga om vaihawm mi sawm sangin mipilpa a pilna in hatsahzaw hi.

²⁰A tahtahin leitungah a hoi-a a gamta, a maw ngai vawt lo midih khat zong om lo hi.

²¹Mi thugen popo thudon paipai sin, tua hi sihle na nasempa ang gausamna na za kha ding hi;

²²nang mama in na lungsim sungah midangte tamveipi na samsietna na thei hi.

²³Tam teng zosie pilna tawh ka zelah hi; keima in, “Pil ta vang,” ka ci a, hinanle tua khu kei bat zawh ding ahi sih hi.

²⁴Tua pen gamla mama a, zong a thuh, a thuh mama ahi hi; koi in tua khu mu zo ding ahei?

²⁵Keima in pilna le na vannuoi kigawmna thei-in kantelin a sui dingin ka lungsim ka hei a, tua gitlona ka thei sawmna khu motna ahi a, tua motna zong khu ngolna ahi hi.

²⁶Keima in sina sanga a siehuoizaw numei khat ka mu a, tua nu pen thang kamsa bang ahi a, ama’ lungsim pen piel le lenthang kisie bang a, ama’ khut gelah siakhau a om hi; Pasien’ lungsim a sukhate tua nu kung panin suohta a, ahi vangin a thangah maw neite a awh uhi.

²⁷Siepa[17] in, en in, ka sil mu khu tam ahi hi, a kigawmna ka mu nadingin na khat tungah adang khat ka gawm a,

²⁸ka lungsimin tua khu ka suisui a, hinanle ka mu zo sih hi. Ka kimupi pasal tulkhat lahah khat bang ka mu a, hizongle tuate zosie lahah numei khat beh ka mu zo sih hi.

²⁹En in, kei mu tam beh ahi hi, Pasien in mihingte a thutang dingin ei bawl a, ahi vangin amate in gelna tampi a nei uhi.