Read Zou THUHILNA 8 Bible Online

THUHILNA 8 - Zou bible

THUHILNA 8

¹Mipilpa tawh kibang koi ahei? Na khat’ a khietna koi in let thei ahei? Pilna in mite maitaisah a, ama’ melpuoh hoimaw a kikhelsah hi.

²Pasien tungah kiciem zo na hi ziehin kumpipa’ thupieh zui[18] in.

³Zau poma sin; ama in a nop bangin na sem ahi ziehin, thu a hoi khol lo ciengin ama kung panin uoikai loin peikhie in.

⁴Bang ding ahei cile kumpipa’ kammal in vangnei a, ama kungah, “Bang bawl na hei?” ci-in koi in ci thei ding ahei?

⁵Ama’ thupieh a mang poma in sietna tuohkha lo ding a, mipilte’ lungsim in a hun le a lampi a thei ding hi.

⁶Azieh pen amate tungah mihingte’ lungkhamna gihtahin a kikhan vangin, na vannuoi in a hun le a lampi nei hi.

⁷A tahtahin amate in bang hing pieng ding ci a thei sih vua, tua ziehin bang ang ci pien ding ahei ci amate kungah koi in gen thei ding ahei?

⁸Hui[19] tungah koima in thunei-in tua hui[20] tucip thei lo a, si ni ding tungah zong koima in thu nei thei lo hi; gal kikap sungin a kitawpsah koima a om sih a, gitlona in migilote a hunkhie thei sih hi.

⁹Keima in leitunga kibawl zosie ka lungsim sungah ka ngaisun a, mi khat in adang khat’ siet nadingin a thuneina a zahna teng zosie ka mu hi.

¹⁰Tua ciengin mi gilote si-in a kivui ka mu hi; mun siengtho panin amate sungtumin a pusuoh zel vua, tua bang a gamtatna ziehun khuopi sungah phatna a nga uhi. Tam zong a mawhnapi ahi hi.[21]

¹¹Gitlo gamtatna tungah mallang taha thukhenna a kibawl lo ziehin mihing lungsim in sietna bawl ding ngen tang a sawm hi.

¹²Mawneite in za vei dong sietna bawlin a hinkhuo uh sawt nanle, Pasien a giing mite adingin thu zosie nuom ding hi, ci ka thei hi; azieh pen amate in Pasien a giing uhi,

¹³ahi vangin migilote adingin thu nuom lo ding a, a hinkhuote uh nihlim bangin a sausah thei sih ding uhi; azieh pen amate in Pasien a giing sih uhi.

¹⁴Leitunga a pieng a mawhnapi khat om a, tua khu mi dihte in migilote’ gamtatna a thuohlaw vua, migilote in mi dihte’ gamtatna a hamphatlaw uhi. Tami zong khu a mawhnapi hi, ka ci hi.

¹⁵Leitungah mihingte in an ne tui dawnin amau le amau a guolnop ding vala a hoi om lo ahi ziehin a guolnop ding uh pha ka sa mai hi, azieh pen Pasien in leitungah a hin sungun amate a pieh a nasep gimna uh sung panin a nga thei ding uh tam beh a om hi.

¹⁶Pilna nga thei nading le leitunga na kisemte theithei nadingin sun le zanin mite bangci kimutmaw va-ia uh ahei ci ka lung gelgel ciengin,

¹⁷leitunga a pieng Pasien’ nasepna zosie koima in a theizawh lona ka mukhie hi. Amate in tuami suina-in a gimlaw vangun a mu zo sih ding uhi; mipilte in thei a kisah vangun a thei sieng zo sih uhi.