Read Zou THUHILNA 9 Bible Online

THUHILNA 9 - Zou bible

THUHILNA 9

¹Keima in tamte zosie ka ngaisun a, Pasien’ khut sungah midihte, mipilte, le amau’ septe bangci op ci ka mukhie hi; itna zieh amah, ahi sihle muda zieh ahei ci koima in thei lo hi. Amate tawh a kisikha vannuoi

²a mawhnapi[22] ahi hi, azieh pen midihte le migilote, mihoite le mihoi lote,[23] mi siengthote le mi siengtho lote, biehpiehna a neite le biehpiehna a nei lote zosie tungah a kibang laitanna a tung hi. Mihoite tunga a tun bangin mawneite tungah a tung hi; a kiciemte zong a kiciem lo pa tawh kibang hi.

³Leitunga thupieng zosie lahah a siehuoi khat pen tami ahi hi, tua khu mi vannuoi tungah laitanna a kibangin a tung hi.

⁴Ahi vangin a hinglai zosie tawh a kizom poma in kinepna a nei hi, azieh pen a sisa humpi sangin a hinglai ui khat hoizaw hi.

⁵A hinglaite in a si ding uh thei a, ahi vangin a sisate in bangma a thei nawn sih uhi; amate in thaman a nei nawn sih vua, koima in zong amate a phawhkha nawn sih hi.

⁶A itna uh, a mudana ule a thangsietna uh mangthai sieng a, amate in leitunga pieng na zosie tungah satanh kici himhim a neikia ngai ta sih ding uhi.

⁷Pei in, lungdamna tawh na an ne inlen, lungnopna tawh na zu dawn in; bangzieh ahei cile Pasien in na sepnate a sawtvei laipi-a ang na pompiehsa ahi ta bo hi.

⁸Na puonsilte a kang vive hisah in; na lu zong sathau tawh kita sah sin.

⁹Pasien in leitunga ang pieh a mawhnapi ahi na hinkhuo nite, na it mama na zi tawh nuomtahin zang in, azieh pen tam leisiet na hinkhuo-a na sep gimnate ziehin na lemlaw khu tua beh ma ahi bo hi.

¹⁰Na khut in sep ding a mu popo na tha neiza tawh sem in; azieh pen Misikhuo ah nasepna, thu ngaisutna, theina, le pilna cite a om sih hi.

¹¹Leitungah ka mukia thu khat in tai kidemna ah mi malgangte in zo kim lo a, mi thahatte in zong gal zo kim loin, mipilte in an kham kim lo a, miteite hau kim tuon loin, misiemte in zong maipha nga kim tuon lo hi; hizongle hun le ni kiheina dung zui-a amate tunga na pieng ahi bo hi.

¹²Azieh pen koima in a vangsiet hun ding a genkhol thei sih hi. Nga len tawh a kimante le va thanga a awhte bangin, amate tungah tua bang vangsietnate thakhatin a tun ciengin, mihingte zong a awh uhi.

¹³Leitungah tami pilna gentena zong ka mu a, tua khu kei adingin a thupi mama hi.

¹⁴Mi tawmno khat’ tenna khuoneu khat a om hi. Tua khuo sim dingin a thahat kumpi khat kuonin galkap tampi tawh tua khuo a kui-im hi.

¹⁵Tua khuo sungah a pil mizawng khat om a, tuale ama in a pilna tawh tua khuo hunkhie hi. Hizongle tua mizawngpa koima in a phawhkha sih hi.

¹⁶Tuaci’n keima in, “Thagum hatna sangin pilna hoizaw hi; hizongle tua mizawngpa’ pilna kithusim pieh lo a, ama’ thugente kingai pieh lo hi,” ka ci hi.

¹⁷Mimawte lahah uhpa khat’ kikona i ngai sangin oldam taha mipilte’ ham thupisim huoizaw hi.

¹⁸Kidona galhiemte sangin pilna manphazaw a, ahi vangin khielna khat in na hoi tampi susie thei hi.