Read Zou SOLOMON LA 4 Bible Online

SOLOMON LA 4 - Zou bible

SOLOMON LA 4

¹Ka sen ngaino duongsuo kilawm, na duong melhoi kikhai dingdiang! Na khudiel tawh na maimit gel khuva maimit dung no zil e. Na basam zong Gilead tanga lengkel honte tuolkum zil e.

²Na tuhha pa silselte’n zong besam kimet damtui-a buol pheiphung suonto tuuhon dung zil, a unsiengin a kopin pieng, mal a tuom kai ci om lo e.

³Sam khau san bang’ na muh kilawm, na tongsuo zong ningzu bang khum. Langmai khuna dielvang kawm pan na bieng gel no, mang kawlsing ga phalsuo zil e, san pimpem uh.

⁴Na ngawng zang khu tang ngalliemte’n tulkhat a sim a lum khaina, a guola cien David’ dawsang dung no zil e.

⁵Na anglai-a nunkhum ni gel unoh papete zalai-ah sawl a hei khawm, zuhsa pengkop khisa no ni duong zil hi e.

⁶Zingdam vulkhi a lan masang, zingdam taikhuo a val masang, myrrh muol le gimsi namtui a muoltangah muol khup zuai vang.

⁷Ka sen ngaihno, duong kikhaikim zo ma cie maw; na kung tung teng kawbang sih teh.

⁸Keima’ angkawi ding nu aw e, Lebanon pan kei tawh zawh vai. Lebanon pan kei tawh zawh vai. Sangsa limlien humpi zalna kuo le sangsa kamkei sawl bang heina a lenmuolte, lenmuol Amana aw, Amana kuivum lenmuol Senir, Hermon-te khu nungsie inlen[6] macieng suon in.

⁹Ka angkawi ding ka sannem no, ka sin lunglai ei kuoi luo teh, na ngawng awkhi suongmanpha tawh khatvei hemlam maimit nei paih, ka sin lunglai ei kuoi luo teh.

¹⁰Ka angkawi ding ka sannem no, vang nei ngaina ningzu bang khum! Vang nei ngaina ningzu sang zong hlum cia zaw lai, na nu sathau tumtai sang zong namtui zaw sa’ng!

¹¹Angkawi ding nu, na phune pan paazu hlumno dai bang taasuh, na dangtawngah ningkhuoizu le sebawng nunkhum li bang kicing. Lebanon gam gimsi bangin na silpuonte namtui sa ing.

¹²Angkawi ding nu ka sannem no, deizun huonlei imtuom no aw, deizun huonlei imtuom no aw, a samtui nah imtuom no aw.

¹³Na huonlei[7] ah tulsing namcin, gathei minlun mang kawlsing le, henna le nard tulsingte tawh ci bang deiteel gathei minlunte tawh poton.

¹⁴Namtui tulsing li bang cinna nard le saffron, calamus le cinnamon-te, myrrh, aloes gimsi namtui, kaitui banga gawmna hi cie.

¹⁵Khanghuon samtui, hinna tuikhuh no zong hi cie, Lebanon tang tawn a luong damtui no zong hi cie.

¹⁶Zuong hing tho in, mal vulkhi aw, hing langto ven sim vulkhi aw! Ka khanghuon teng hing sem inlen, namtui gimsi’n muncin zel heh. Ka sen ngaino’n a khanghuon ah, pheiphung suonin, ci bang deiteel gathei minlun hing ciemsah un.