Read Zou SOLOMON LA 6 Bible Online

SOLOMON LA 6 - Zou bible

SOLOMON LA 6

¹Zatam lienute zalai-ah duong kikhai pen nu no aw e, na sen ngaino koi kuom macieng suon ahiei maw? Koi kuom sawl bang hei a hiam maw? Na san nemno nang tawh sa bang vai ton nuom ing.

²Gimnam tulsing li bang cinna a khanghuon-ah, ka sannem no vailo kuon e. A khanghuon-ah a tuuhonte ham bang huoi ding, unoh paapete khawm dingin ka sen ngaino vailo kuon ta.

³Ka ngai kei-a’, kei ama-a’, Unoh pal huon a zalai-ah a tuuhonte khing-an tul e.

⁴Duongsuo melhoi, ka sen ngaino, Tirzah vangkhuo dung zil hi cie, Jerusalem vangkhuo bangin etin lawm teh. Khaidielte tawh lal ma a nawh galkap hon bang giinhuoi ma cie.

⁵Na maimitin ei suon nawn si’n, ka sin lunglai ei zen luo teh! Na besam in lengkel honte Gilead tang tawn tuolkum zil e.

⁶Na tuhha pa silselte in besam kimet damtui-a buol pheiphung suonto tuuhon dung zil. A unsiengin a kopin pieng, mal a tuom kai ci om lo e.

⁷Langmai khuna dielvang kawm pan na bieng no gel, mang kawlsing ga phalsuo zilin san pimpem uh.

⁸Vaimang angkawi sawmguhte le, a meite zong a sawmgiet-a sim, zatam lienute ahile sim zawh hi sih.

⁹Duong kikhaikim, ka khuva no ka sinlai kuoi nang beh hi teh. Tunnu vontawi deituom hi e, pienna tunnu ding’ nuol bei sa’ng. Lie zatamte’n mel a mu cieng, nunnuom nga bang lamnu ci uh. Vaimang angkawi le a meite’n ka ngai lienu lam bang pah uh.

¹⁰“Zingdam taikhuo val dung zilin, tung solkha tang banga etlawm, sunni vangtang dung no zilin, lal nawh dinga khaidiel teng tawh pal bang kicieng galkap hon bang, a giinhuoi khu koi ta ahiei?” ci’n tong lel uh.

¹¹Kuom thuh a po tulsing pate gathang banga a vil ding le lengguite in dawn a suong tai, mang kawlsingte a pal lun tai cia, maimit suon ding tulsing huon-ah vailo kuon ing.

¹²Ka sin lung a ka thei masang, ka lailungin vaimang[11] nen a kolleng tungah kei va to ing.

¹³[12] Aw Shulam lienu! Sul hing hei ven, sul hing vei ven, nangma’ duongsuo ka maimitin ka suon nading, sul hing hei in, sul hing hei in. Galkap guolni[13] ciente’ mai-a lamvui et bang, a bang dingin Shulam lie-te na mai mitun suon na hi vuoi?