Read Zou ISAIAH 14 Bible Online

ISAIAH 14 - Zou bible

ISAIAH 14

¹Hinanle TOPA in Jacob tungah lainatna nei a, Israel teelkia-in a gam sung vuah amahaw a koikia ding hi; tuale gamdang mite in amate pawlin tuaci’n amate in Jacob innkuon a bel ding uhi.

²Mite in amate manin a gam vuah zawpi ding a, Israel innkuon in TOPA’ gam sungah minamte[41] sila pasal le sila numei-in a nei ding uhi; amate in sala a man ngai mite salin a lemat mat ding vua, amate a bawlsie mite tungah vai a hawm ding uhi.

³Na lungkhamna, na buoina, nasep hamsapi sepna panin TOPA in note toidamna ang pieh ciengin,

⁴Babylon kumpipa tungah tam ehneh hona kam na zang ding uhi: Mi bawlsie pa khu bangci manthai a ta e! Mi simmaw hatpa[42] khu bangci manthai a ta e!

⁵Khawl loin mite satna-a kizang, lungthahna tawh minamte tungah vai a hawm, nahpitaha a bawlsie, migilote’ ciengkhut le gam uhte’ ciengkhut khu TOPA in sattanpieh zo hi.

⁷Leitung mi buppi tawlnga-in a sip dide uhi; amate in la sa-in a kiko uhi.

⁸Na tungah taasingte a lungdam vua, Lebanon gam sunga taamtah singkungte in, “Nang ang kiniemkoi-a kipanin kote ei phua dingin koima ang pei ta sih hi,” ci uhi.

⁹Na vaitun a dawn dingin leinei-a misite a kiling uhi; nang ang dawntuo dingin leitung makai zosie’ hlimte[43] kithosah hi; leitung kumpi a sem ngai zosie a kumpi topha ciet uh panin a thosah hi.

¹⁰Amate in a unpi-un nang hing hopi-in, “Nang zong kote ma bangin thazawm ta teh! kote ma bang ta teh!” ang ci ding uhi.

¹¹Misikhuo-ah na kithupisahna le na harp lasahna awte kipeipisuh ta hi; thante na netpha ahi ta a, zangh-ehte zong khu na kihuina puon ahi ta hi.

¹²Phalvah’ tapa Zingsol aw, vantung pan nang a bangci kieh na hiei! Minamte a niem koi pa ahi nangma, leilah dongah ang bangci kisattan dawh ahiei?

¹³Nang in na lungsim sungah, “Van tungah kato vang; Pasien’ aasite tungah ka kumpi topha sangkhan vang; Zaphon[44] munsangte tung, kikhopna muol tungah kato vang;

¹⁴meiilumte dawnah kato vangin, kei le kei Sangpen Pa bangin kibawl vang,” na ci hi.

¹⁵Hizongle nang pen Misikhuo, a thuh pente muna Hankhuh sung dongah ang kipeipi suh ahi ta hi.

¹⁶Nang ang mute in ang encien ding vua, amate in nangma’ thu a lungngai dedu ding uhi: “Leitung a kilingsah pa, kumpi gamte a lawhthing pa,

¹⁷senel gam bangin leitung bawlin, a khuopite a lumlet pa, thongkiete inn-a a peisah lo pa khu tam pa hi lo amah?” a ci ding uhi.

¹⁸Minamte’ kumpi zosie a hankhuh ciet vuah thupi tahin a lum uhi;

¹⁹ahi vangin nang pen na han panin a kidahhuoi misi uite[45] bangin ang kipaimang a, namsau in a sut pailet, Hankhuh suongte sunga a kumsuh, keng tawh kituoncil misite bangin, luonghawmte in nang ang khucip hi.

²⁰Na gam susie-in na mite that zo na hi ziehin, nang pen amate tawh ang kivuiton sih ding hi. Sietna bawlte’ a suon a hlahte’ min kilo ngai nawn sih taheh!

²¹A pate uh’[46] khielna ziehin a tate thalia nading mun bawlkhol un. Amate leitang luo dingin thosah ngai nawn sih unlen, ahi sihle khuopite in leitung maitang tuomsah sih un.

²²Vanglien TOPA in a cina-ah, “A langkhat vuah ka pang ding a, Babylon’ min le a omlaite’ tate le suonlehlahte ka sumaimang ding hi, TOPA in ci hi.

²³Tuale keima in sakute busah nadingin tua khuopi bawlin buoltui ka veisah ding hi; tua khu keima in suhsietna munphie tawh ka phiet sieng ding hi,” Vanglien TOPA in ci hi.

²⁴Vanglien TOPA kiciemzo hi: Ka tupnasa bangin a pieng ding hi; tuale ka gelsa bangin a tung ding hi:

²⁵Ka gam sungah Assyria-te ka susie ding a, ka muolte tungah ama ka tuoncil ding hi; amate kung panin a hahkol kisut ding a, a liengko panun a vangih uh kisut ding hi.

²⁶Tami in leitung bup tawh kisai-a a kingim gelna ahi hi; tam khut pen minam zosie tunga kizah khut ahi hi.

²⁷Vanglien TOPA’ gelsa ahi ziehin koi in sumit zo ding ahei? Ama’ khut kizah zo ta hi, koi in dawhkia ding ahei?

²⁸Kumpi Ahaz a si kumin tami thuphuon a tung hi:

²⁹Philistia-te zosie aw, note ang kisatna cieng a tawn ziehin lungdam sih un, azieh pen gul gui panin gul gunei a pien bangin, a suonlehlahte a leng thei gulpi a suoh ding hi.

³⁰Mizawngte’ tacilte in an a ne ding vua, tasamte bihtahin lum hit-hiet ding uhi; na zungpi ka kielsisah ding a, a omlai nangma’ mite ka[47] that ding hi.

³¹Kotpi aw, kap vapo in; khuopi aw, awng vapuoh in; no Philistia-te aw, na unpi-un zau-in tuisuohmang un! Azieh pen leilu lam panin meikhu kitungto a, amate a guolguolin a tangtat koima om lo hi.

³²Mi khatpo in minam kamtaite bangci dawn thei ding ahei? “TOPA in Zion phutkip zo a, tuale amate lahah a tasamte in ama sungah kibuhna a mu uhi,” ci-in dawng ding uhi.