Read Zou ISAIAH 15 Bible Online

ISAIAH 15 - Zou bible

ISAIAH 15

¹Moab tawh kisai thuphuon ahi hi. Zan khat sungin Ar a kisuhsiet ziehin Moab gam kisie hi; zan khat sungin Kir a kisuhsiet ziehin Moab gam kisie hi.

²Biehinnpi-ah Dibon[48] peito a, a kap dingin munsangte ah a kato hi; Nebo le Medeba ziehin Moab nahpi-in kap hi. Luzang zosie kimettol a, khamul zosie kimetkieu hi;

³khuopi lampite-ah la-ip puon a sil uhi; innkhum tungte le tuol-awngte ah mi zosie kapin hlitui luong hi.

⁴Heshbon le Elealeh a kap vapo vua, Jahaz dongah a awgingte uh kiza hi; tua ahi ziehin Moab’ kawngte kiling hi;[49] ama a citun hi.

⁵Ka lungtangah Moab adingin ka kap hi; galtai a mite Zoar le Eglath-shelishiyah ah tai uhi. Azieh pen Luhith katona lampi-ah a kaa kawmun amate a peito uhi. Horonaim zotna lampi-ah manthaina awging tawh a kap uhi;

⁶Nimrim tuite kang zo hi; hampate gawta sieng a, a dawntha suong ding om nawn loin, lohing khat beh om nawn lo hi.

⁷Tua ahi ziehin amate in a sui a zon uh a nei a lamte ule a kholsa uh na tampite, Gielheh Lui galah a puo uhi.

⁸Azieh pen Moab gam kimvelah kaana aw khat ging hi; kaa le mau in Eglaim le Beer-elim dong ban hi.

⁹Azieh pen Dibon[50] luituite sisan tawh kidim a, hinanle Dibon tungah a tamzaw ka tungsah lai ding hi, Moab a suohtate ading le gam sunga a omlaite adingin keima in humpi khat ka langsah ding hi.