Read Zou ISAIAH 16 Bible Online

ISAIAH 16 - Zou bible

ISAIAH 16

¹Senel gam zotna lampi Sela panin Zion tanu’ muolsang ah gam-uhte adingin tuunote puoh un.

²A bu kithezahpieh vate bang le a hla zapin a leng kawikawi vate bangin, Arnon tanmunte-ah Moab’ tanute, tua bangin a om uhi.

³“Thu ei kikuppi unlen, thutang tawh thu ei khenpieh un; sunkim laitahin na hlim zanlai bangsah in. A kipampaite phuol inlen, a galtaite leheh sin;

⁴note lahah a kipampai Moab-te tengsah in; mi susiete lah panin a kibuhna uh na hi ta in,” ci hi. Mi bawlsie pa a op nawn lo ciengin suhsietna zong veng a, gam sung pan misuomte a manthai ciengin,

⁵itna kip sungah kumpi topha khat kiphut ding a, thutang sui-in thuman sep ding a kinaw uhpa khat, David’ buh sunga tua topha tungah muonhuoi tahin a to ding hi.

⁶Eite in Moab’ kiphatsahna i za zo ta hi. Kinah phatsah sam ei! A kihisahna, a kiphatsahna, a kilietsahna, a kisielnate zuoupi ahi hi.

⁷Tua ahi ziehin Moab kap hinlen, Moab adingin mi zosie kap uheh. Kir-hareseth khuo-a lenggagaw mohte adingin lungsie-in kap un.

⁸Azieh pen Heshbon lote lah tul ta a, Sibmah lengguite zong vul sieng zo hi. Hun khat lai-in tua lengga bawhte in minam uliente na tekham ngai a, tuate in Jazer dong banin senel gamah a zamsuoh hi. Gamlapi-ah a bate zam a, tuipi kantanin a zam hi.

⁹Tua ahi ziehin Sibmah’ lengguite adingin, Jazer-te’ kaa bangin keima ka kap hi; Heshbon le Elealeh aw, ka hlitui tawh kang tehlopsah hi. Bangzieh ahei cile na singga lah ule na anlahte tungah kikona sip zo hi.

¹⁰Lei hoina lolai-ah kipahna lungnopna kilamang zo ta hi. Lengga huonte-ah la kisa nawn lo a, kikona zong a om nawn sih hi. Lengga cilna-ah koima’n lengga tui suh nawn lo a, lengga a kilaw cienga kikona aw zong a sip ta hi.[51]

¹¹Tua hi a, Moab adingin harp bangin ka lungtang kisat a, Kir-hares adingin zong kei mama ka kisat hi.

¹²Moab, amama a kilah cieng, munsang tungah lung gimin a pei cieng, a mun siengtho-ah thungen dinga a pei ciengin a lawcing sih ding hi.

¹³TOPA in tu masangin Moab tawh kisai-in tam thu a na gensa ahi hi.

¹⁴Ahi vangin tu-in TOPA in, “A kiciel nasempa’ kum simdan banga a kisim kum thum sungin, ama’ mipite tam tamale Moab’ vanglietna in simmawna thuoh ding hi; tuale a omlaite zong a tawm sengin thanem ding uhi,” a ci hi.