Read Zou ISAIAH 17 Bible Online

ISAIAH 17 - Zou bible

ISAIAH 17

¹Damascus tawh kisai thuphuon ahi hi. En un, a khuopi hina panin Damascus khawl ding a, a kisie buathah lomtang a suoh ding hi.

²A khuopite kinuasie peisuoh ding hi;[52] tuate ganhonte tatna mun suoh ding a, ganhonte lum hit hietin, koima in amate a zausah sih ding hi.

³Ephraim panin kulpi mangthai ding a, Damascus panin zong kumpi gam mangthai ding hi; tuale a omlai Aram-te pen Israel mite’ vanglietna bang ding uhi, Vanglien TOPA in ci hi.

⁴Khum ni ciengin Jacob’ vanglietna kiniemsah ding a, a tahsa tunga a thauna pen gawngtam ta ding hi.

⁵Anlate in ankung po lai kaikhawmin, anvuite khut tawh a at bang le, mi khat in Rephaim Kuomah buvuite a khon bang hi ding hi.

⁶Olive kung a kilawthing ciengin, a bameng sangpen dawna a ga ni ahiei thum ahiei, theikung bamengte tunga li ahiei, nga ahiei a op bangin ansanghte kinuasie ding hi, Israel-te’ TOPA Pasien in ci hi.

⁷Khum ni ciengin mite in amate a Bawlpa thupisimin a mit un Israel-te’ Siengtho Pa a en ding uhi;

⁸amate in a khut utawh a bawlsa uh maitamte thudon loin, a khutme tawh a bawlsa uh khuom siengthote[53] hitale maitamte hitale etin zong a nei nawn sih ding uhi.

⁹Tua ni ciengin a khuopi muonhuoite uh pen Hiv-te le Amor-te[54] in Israel mite’ zieha a nuasie uh munte tawh kibang ding a, tua mun gamdai a suoh ding hi.

¹⁰Azieh pen na hundampa uh Pasien na mangngil ta vua, na kibuhna uh Suongpi na phawhkha ta sih uhi; tua ahi ziehin kung hoite suon nan locin, gamdang pasien na bieh nading vua, na suon uh ahi bo a,

¹¹note in na suon ni ma-un tuate khangsahin, na vaw ni uh a zingmawngin tuate paasah thei nan locin, gimna le damsah thei lo natna ang tun ni-in, anlah ding teng a maimang ding hi.

¹²Ah, mi tampite’ husa ging, a husa ging ukhu tuipi lien huging tawh kibang ei! Ah, mi tampite awhna khu tuihatte’ gin vapual tawh kibang ei!

¹³Tui tampite a hawh vapuoh bangin, minamte a hawh vapuoh vua, hinanle ama in amate phawhsie ding a, gamlapi-ah amate a taimang ding uhi. Muol tunga hui mai-a a leng ansi bang le, huipi mai-a a lengmang leivui bangin amate kidelmang ding hi.

¹⁴En in, nitah ciengin zauna a om ding hi! Zingmawng masangin tuate om nawn lo hi. Tamte pen ei susiete’ tuo ding thu le, ei bulute’ tanh ding thu ahi hi.