Read Zou ISAIAH 2 Bible Online

ISAIAH 2 - Zou bible

ISAIAH 2

¹Amoz’ tapa Isaiah in Judah gam le Jerusalem tawh kisai-in tam bangin mu hi:

²Ang tung ding nite ah TOPA’ biehinn muol pen muol golte lahah a sang penin kikipsah ding a, tuale muoltangte tungah a kitawisang ding hi; minam zosie in tua mun a zuon valuoi ding uhi.

³Mi tampite a haw ding vua, “Hing pei un, Jacob’ Pasien’ biehinn, TOPA’ muol tungah va kato ta vai; tuaci’n eite in ama’ ketot i zui thei nadingin, ama in eite tungah a lampite ei hil ding hi,” a ci ding uhi. Azieh pen Zion panin thuhilna pusuoh ding a, Jerusalem panin TOPA’ kammal pusuoh ding hi.

⁴Ama in minamte kikalah thukhen ding a, mi tampite adingin kiselna vengsah ding hi; amate in a namsaute uh kangkui-in a kheng ding vua, a teipite singba heuna namkawi-in kheng ding uhi; minam khat in minam khat tungah namsau leh nawn lo ding a, amate in galdo dan zong a sin nawn sih ding uhi.

⁵Jacob’ innkuonte aw, hing pei unlen, TOPA’ khuovah sungah kalsuon va vui!

⁶Azieh pen no Jacob’ innkuonte aw, note in na mite’ lampite[3] na taisan zo uhi. Amate nisuona lam pana aisante[4] tawh a kidim vua, Philistia-te banga thu mavang gente ahi uhi. Gamdang mite tawh amate khutbeng tonin a om uhi.

⁷A gam uh ngun le kham tawh kidim a, amau’ goute in tawp hun ci nei lo hi; a gam uh sakol tawh kidim a, a lengte un zong tawp hun nei lo hi.

⁸A gam uh milimte tawh kidim hi; a khut vua a bawlsate’ mai, a khutme vua a bawlsate’ mai-ah amate a kun uhi.

⁹Tuale mite a neilut vua, mi zosie kiniemkoi suh hi, amau’ mawna maisah sin!

¹⁰TOPA’ giinhuoina pan le a thupi a vanglietna panin suongpi-ah lut unlen, leivui lahah kiphuol un.

¹¹Mite’ kilietsahna mitte kiniemkoi ding a, mi zosie’ kiphatsahna kiniemkhieh ding hi; khum ni ciengin TOPA beh kitawisang ding hi.

¹²Azieh pen Vanglien TOPA in a kiphasah le a kiliensah zosie, a kitawisangte le a kidomsang zosie;[5]

¹³a kidawh sang, a kilamto, Lebanon muol taamtah kung zosie; Bashan gam sunga gangpi sing zosie;

¹⁴muol sang zosie le muoltang sang zosie;

¹⁵inn dawsang zosie le kulpi muonhuoi zosie;

¹⁶Tarshish tembaw zosie le khut siema[6] kibawl a etlawm na zosie tungah, ama in ngiemkoi hun ding ni khat a nei hi.

¹⁷Mite’ kilietsahna kiniemkhieh ding a, mite’ kiphatsahna kiniemkoi ding hi; khum ni ciengin TOPA beh kitawisang ding hi.

¹⁸Milimte zosie mangthai sieng ding hi.

¹⁹Leitung zausah dinga ama ang kipat ciengin, TOPA’ giinhuoina le ama’ a thupi a vanglietnate panin, a vanglien ama’ thupina panin suonghawm sung le leihawm sungah mite lutin a kiphuol ding uhi.

²⁰Khum ni ciengin mite in bieh dinga a bawltawm uh kham le ngun milimte, bahte le buite tungah a paimang ding uhi.

²¹Leitung zausah dinga ama ang kipat ciengin, TOPA’ giinhuoina pan le a lien a minthanna panin suonghawm sung le kenkawm sungah amate a lut ding uhi.

²²A nahvanga a husang beh ahi mihingte panin kihei un. Amate leltah banga simtah ahei?