Read Zou ISAIAH 22 Bible Online

ISAIAH 22 - Zou bible

ISAIAH 22

¹Mangmuna kuom tawh kisai thuphuon tami ahi hi. Note na unpi vua innkhum tunga na kato uh bang na deina uh ahei?

²kikona husa a dim, a gamlum khuopi, lungdam a kipah khuopi aw, na sunga kithatte khu namsau tawh kithat ahi sih a, gal sunga si zong ahi sih hi.

³Na ulien vaihawmte zosie a taiton ta uhi; thal[60] zah kul loin amate kiman sieng hi. Gamlapi-ah taimang nan locin ang kimu note zosie ang kiman hi.[61]

⁴Tua ahi ziehin keima in ka ci hi: “Kei ei en sih unlen, hlitui naptui luongin ei kapkap sah un; ka it ka mite sina ziehin kei henep ding hing hanciem da ta un.

⁵Azieh pen Vanglien TOPA Pasien in mangmuna kuom sungah buoina le kitotcilna, kitawhnawina, kulpite suhsietna le muolte kungah panpi ding ngenin kikona ding ni khat a nei hi.

⁶Sakol leeng le sakol tunga tuongte tawh Elam-te in thallawng a puo vua, Kir mite in a lumte uh a hawhmang uhi.

⁷Na kuom dei pente uh sakol leeng tawh kidim a, sakol tunga tuongte kul kotpite-ah a pang uhi.

⁸Ama in Judah’ kidalna lamang zo ta hi. Tua ni ciengin nangma in Gammang Inn sunga kikoi galhiemte na en a,

⁹tuale nang in David khuopi sungah mun tampitah a kisietna na mu a, tuale nang in buol nuoinung tuite na cing hi.

¹⁰Nang in Jerusalem innte na sim a, a kisie kulbangte puophat nadingin innte na phel hi.

¹¹Kulpi ni kikalah buol lui-a tuikhol nadingin nangma in tuibem khat na bawl hi. Ahi vangin nang in tam a bawlpa etin zong na nei sih a, sawtpi lai-a a gelpa na thuse sih hi.

¹²Tua ni ciengin Vanglien TOPA in a kap a mau ding, lu heukieu ding le la-ip puon sil dingin keima ei hlan hi;

¹³hinanle kipahna le guolnopna, bawngtang le tuute gawna, sa nehna le zu nehna a om zawsop a, “Zing cieng si ding i hi ziehin ne vai-in dawn vai,” na ci zawsop uhi.

¹⁴Vanglien TOPA in ka bilkawm-ah thu ang gen hi: Na si masangun tam mawna hing kimaisah het lo ding hi,” Vanglien TOPA Pasien in ci hi.

¹⁵Vanglien TOPA Pasien in tam bangin gen hi: Hing pei in, tam inn sung vaipuo neisa kempa Shebna kungah pei inlen ama kungah tam bangin gen in:

¹⁶Tami sungah nang dinga hankhuh a to, a sangna munah hankhuh a bawl, na op nading suong a lem mipa aw, nang in tami munah bang thu na nei a, na sanggamte koi teng ahei?

¹⁷Ka mihing pa aw, TOPA in nang ang paimang gawp ding hi. Ama in nang hing pummatin zong hing tudetin,

¹⁸ang pingpei ding a, mun tanzau-ah bawlung a kise bangin ang sep ding hi; na pu’ innkuon dinga muolphona ahi nang pa aw, nang tua munah si-in, na kisahtheipi na sakollengte lahah na pua ding hi.

¹⁹Na nasep panin hing kisuon ding a, na dinmun panin zong hing kikaisuh ding hi.

²⁰Tua ni ciengin Hilkiah’ tapa, ka nasempa Eliakim ka hlan ding a,

²¹na puontuol ama silsahin, na kawnggah tawh ka gah ding hi. Ama’ khut sungah na thuneina ka pie ding a, tuale Jerusalem-a a tengte ading le Judah innkuonte adingin ama pen pa khat ahi ta ding hi.

²²Keima in ama’ liengko-ah David innkuon’ tawhtang ka koi ding hi; ama in hong ding a, koima in khah zo lo ding hi; ama in khah ding a, koima in hong zo lo ding hi.

²³Keima in munkip khatah van khaina bangin ama ka khendet ding a, a pupa innkuon dingin ama pen a zatahhuoi kumpi topha hi ding hi.

²⁴Tuale a pupa innkuon’ vang teng zosie ama tungah khai-in, ama’ cihlahte le a ta a naute, vanzah a neu teng zosie, haite-a kipanin thawlte dongin vankhaina-ah a kikhai bangin ama tungah kikhai ding hi.

²⁵Tua ni ciengin mundet khata kikil vankhaina in a lel ding hi; TOPA’ gensa ahi ziehin ama tawngsanin kiesuh ding a, a tunga vangih kikhaite kisie ding hi, Vanglien TOPA in ci hi.