Read Zou ISAIAH 25 Bible Online

ISAIAH 25 - Zou bible

ISAIAH 25

¹TOPA aw, ka Pasien na hi hi; nangma kang domsang ding a, na min kang phat ding hi; azieh pen nangma in na lamdangte na bawl zo a, tangtawnga na gelnate muonhuoi-in thawn ngai lo hi.

²Bangzieh ahei cile khuopi buathah lomtang na suo a, kulpi a nei khuopi a siesa-in na koi ta hi; gamdang mite’ kumpi inn khu khuo a bang nawn sih a, bangma cih hunin kilamkia nawn lo ding hi.

³Tua ahi ziehin mi thahatte in na min ang phat ding uhi; a gawgam minamte’ khuopite in nangma ang zatah ding uhi.

⁴Bangzieh ahei cile nang pen mizawngte ading in kibuhna, amau’ lung kham hunin tasamte adingin kibuhna, khuopi hui lan cienga kidalna le nisat cienga nihlim na hi hi. Mi gawgamte’ bawlsietna pen phalbi huipi tawh kibang a,

⁵gamdang mite’ husa pen mun gawta-a nisa tawh kibang hi. Meiilum a kai ziehin nang in nisa na thuoh zo hi; mi gawgamte’ lasahna khu a kisipsah dide hi.

⁶Tam muol tungah mi zosie adingin Vanglien TOPA in antui pen pawi le lengga zului pawi, gungeh tawh a kidim antui pen pawi le, a kitat zuningcia pente tawh pawi a bawl ding hi.

⁷Tuale ama in tam muol tungah mi zosie tunga kikhu misi puon le minam zosie tunga a kizah puonzalte susie ding hi; ama in a tawntungin sina a valtum ding hi.

⁸Tua ciengin TOPA Pasien in maitang zosie panin hlituite siapieh ding a, leitung mun zosie panin a mite’ mindaina a lahmangpieh ding hi, bangzieh ahei cile TOPA in a genzo hi.

⁹Khum ni ciengin, “En un, tami eite’ Pasien ahi hi; eite ei hutdam nadingin ama i ngah uhi. Tami khu i nganga uh TOPA ahi hi; a hutdamna sungah lungdamin kipah vai.

¹⁰Bangzieh ahei cile tami muol tungah TOPA’ khut kinga ding hi. Ehdum sungah bukung a kisiacil bangin, a opna vuah Moab-te kisiacil ding hi.

¹¹Tuingapte in tui ngapin a khut a zah bangun, amate in tua gam laizangah khutzah nan ule, a khut uh’ hanciemna[66] om tama nanleh, a kiphatsahna uh kiniemkoi veve ding hi.

¹²Ama’ kulpi bangsangte kikhiesuhin kiniemkoi ding a, leivui lah nangawnah kipaisuh ding hi.