Read Zou ISAIAH 27 Bible Online

ISAIAH 27 - Zou bible

ISAIAH 27

¹Khumi ni ciengin TOPA in a hiem mama, a gol mama le a hat mama namsau tawh, Leviathan[71] gulpi tailai le a kikuolviel gulpi dan pie ding a, tuale ama in tuipi sunga om gulhiempi that ding hi.

²Khumi ni ciengin: A deihuoi lengga lo thu la-in sa un!

³Keima, TOPA khu tua lo a cing pa ka hi hi; keima in a hun hunin tui ka buoh hi. Koima in a suhsiet lo nadingin sun le zanin ka ngai zing hi;

⁴Keima in lungthahna ka nei sih hi. Tua sungah ling le khaute a op leh a sattan dingin ka kuon ding hi. Keima in ka haltum ding hi.

⁵Ahi sihle a kidal nadingun kei ei pom uh hinlen, keima tawh kilemna bawl uheh, keima tawh kilemna bawl uheh.

⁶Ang tung[72] ding hunah Jacob ang zung hla ding a, Israel zong dawn suongin ang pallun ding a, a ga in leitung zosie ang dim ding hi.

⁷Ama in ama a satte a satkia bangin ama in amate a sat sam amah? Ahi sihle amate a thatte a kitha bangin amate zong a kithat sam amah?

⁸Hawlkhietna,[73] sal tansahna tawh, nang in amate do ding na hanciem hi; nisuona huipi a lan ni ciengin ama in hui hat tawh amate a tawmang hi.

⁹Tua ziehin tam tawh Jacob’ khielna kimaisah ding a, tuale tam pen a mawna kilahmangna ga bukim hi ding hi: Ama in suong tawh a kibawl maitam suongte suongkang kisatvui a bahsah ciengin, khuom siengthote,[74] ahi sihle gimnamtui maitamte a dinglai om nawn lo ding hi.

¹⁰Azieh pen kul tawh ki-im khuopi a guohtangin a om ta a, a kitaisan le a kinuasie mite’ tenna gamlah a bang ta hi; khumnah bawngnote gamta-in lum a, khumnah amate in singbate a kheuh uhi.

¹¹A bate a gaw ciengin, tuate a tawngsan sieng hi; numeite pei-in mei-a taw dingin sing a tom uhi. Bangzieh ahei cile tam mite pen theitelna nei lo mite ahi uhi; tua ahi ziehin amate a bawl pa in a tung vuah lainatna nei lo ding a, amate a siempa in amate angvan lo ding hi.

¹²Israel mite aw, tua ni ciengin TOPA in Euphrates tuilam panin Egypt Lui dongin note ang zoi ding a, tuale ama in khat khatin ang kaikhawm ding hi.

¹³Tua ni ciengin pengkul golpi khat kimut ding a, Assyria gama a mangthaite le Egypt gama a kinotmang mite pei-in Jerusalem muol siengtho tungah TOPA a bie ding uhi.