Read Zou ISAIAH 28 Bible Online

ISAIAH 28 - Zou bible

ISAIAH 28

¹Ephraim-a zukhamte’ kisahtheipi paakuol le antui ne-in a gil buol le zu in a zawgawpte’ lutunga kikhusah ahi a vul thei, a vanglien, le a etlawm paape in gimna a thuoh ding hi!

²En un, TOPA in a vanglien a thahat pa khat nei hi; huipi gielpi le a mutsie thei huipi bang le, a thahat huipi le a let valuh tuikhang bangin, ama in a khut tawh lei lahah amate a sawnpua ding hi.

³Keng tawh kituoncil ding pen khu Ephraim zukhamte’ kisahtheipi paakuol hi ding hi.

⁴Antui ne-in a gil buol mite’ lutunga kikhusah a vanglien a etlawm, le a vulthei paape pen khallai masanga a min masapen theiga tawh kibang ding a, khatpo in a mu behin loin, a nehtum pai tawh kibang ding hi.

⁵Tuami ni ciengin Vanglien TOPA pen a vanglien paakuol hi ding a, a omlai ama’ mite adingin a etlawm kumpi lukhu hi ding hi;

⁶thukhenna-a a to mite tungah thutang lungsim guon ding a, kulpi tunkotah gal a notdawhte dingin thahatna hi ding hi.

⁷Tam mite zong zu khamin a kilialawm vua, khamtheizu tawh a hawipua valuoi uhi; siempute le kamsangte zong khamtheizu tawh a kilawmlia uhi, tuale zu khamin amate a amtawng vua, khamtheizu tawh amate hawipua valuoi uhi; amate in a man lo mangmuna a mu vua, a thukhen dingte in zong thu a khen thei sih uhi.

⁸Sabuoi tung zosie luoh tawh kidim a, mun siengtho kici zong a om ta sih hi.

⁹“Ama in koi pen khu theina hil ding a, koi tungah thu hilcien ding ahei? Kang sung pana a kiladawh, nawi tawh a kikhente tungah amah?

¹⁰Bangzieh ahei cile thukham tungah thukham, thukham tungah thukham, a guol tungah a guol, a guol tungah a guol, tanah halkhat, khunah halkhat,” ei ci uhi.[75]

¹¹A mantahin, ama in a telha mama kamham le namdangte’ ham tawh tam mite hopi ding a,

¹²ama in a kung vuah, “Tam pen tawlngahna ahi hi; a gimte tawlngasah un; tami lungnopna ahi hi,” ci hi; hizongle amate in a ngai sih uhi.

¹³Tua ziehin amate pei-in a thalpua nading ule amate liemin thangah awh a, sala a kikai nadingun, amate tungah TOPA kammal, “Thukham tungah thukham, thukham tungah thukham, a guol tungah a guol, a guol tungah a guol, tanah halkhat, khunah halkhat,”[76] ci danin a suoh ding hi.

¹⁴Tua ahi ziehin no mi simmawte aw, Jerusalem-a tam mite tunga a uhte aw, TOPA’ thu za un.

¹⁵Azieh pen note in, “Sina tawh thuciem khat i bawl zo ta vua, Misikhuo tawh thukimna khat i nei zo ta uhi; sietna tuihuol in ei nawkhah ciengin ei ban loding hi; azieh pen eite in i bel dingin zuouthu i bawl vua, zuouna le nalna sungah i kibu uhi,” na ci uhi.

¹⁶Tua ahi ziehin, TOPA Pasien in tam bangin a gen hi, “En un, keima in Zion ah a kize-etsa innbul suong, innbul suong kiptah le a manpha innkiu suong khat ka phut hi: “Ama a muong mi poma a zau sih ding hi,” a ci hi.

¹⁷Tuale keima in thutang pen tena pikhau le thudih pen tena suongkhai bangin ka bawl ding hi; gielpi in zuou kibuhna sempal ding a, tuite in tua kibuhna a hlummang ding hi,” a ci hi.

¹⁸Tua ciengin sina tawh kibawl na thuciemna uh kiphel ding a, Misikhuo tawh na bawl uh thukimna uh kip lo ding hi; sietna tuihuol in ang nawh ciengin tua in note ang dengguoi ding hi.

¹⁹Note ang nawh khah sielin ang ban ding hi; azieh pen zingmawng khat zaw zingmawng khat, a sun a zanin note ang nawh kha ding hi; tuale thupieng puoh theina in patauna bihbeh hi ding hi.

²⁰Bangzieh ahei cile keng hluon nadingin lupna tom luo a, kihui nadingin zong puonzal neu seng luo hi.

²¹Bangzieh ahei cile ama’ silbawl-a lamdang a silbawl! ama’ nasep-a tuompien a nasep! a sem dingin, Perazim Muol tunga a sep bangin TOPA kuonto ding a, Gibeon kuom-a a thangpai bangin ang thangpai ding hi.

²²Tua ahi ziehin tu-in mi simmaw sih un, tua ahi sihle note ang kikhina a khauzaw-in ang kibawl ding hi; azieh pen gam buppi tunga om Vanglien TOPA Pasien kung panin kisiet nading thukhenna ka za zo hi.

²³Ngai unlen, ka aw za un; limtah ngai unlen ka thugen za un.

²⁴Lokai pa in khaici the nadingin lo a kaikai amah? Amate in lei kalhin lo gitgit uh amah?

²⁵Amate in lei a zeltam zaw uh ciengin, lengmusel tang vaw-in cummin tang a tu vua, mangbute a guolguolin suonin, a op nading munah mangbuham a tu uhi, tua mangbuhamte a geizui-ah tu uh hi lo amah?

²⁶Azieh pen amate kilim hil mama hi; a Pasien un amate hil hi.

²⁷Lengmuselte khetbuh tawh a kisat sih a, cummin tangte tungah sakol lengpei kihuol lo hi; hinanle lengmusel pen ciengkang tawh kisat a, cummin pen moltum tawh kisat hi.

²⁸Moh bawl nadingin antang kisuguoi a, ahi vangin mite in a cil zing sih uhi; tua tungah mi khat in sakol lengkang le sakol a hawl vangin a guoicim sih hi.

²⁹Tami zong Vanglien TOPA kung pana ang pei ahi hi; thu kuppina lamah ama lamdang a, pilna lamah guol tungtuong hi.