Read Zou ISAIAH 29 Bible Online

ISAIAH 29 - Zou bible

ISAIAH 29

¹Ah, Ariel, David’ phuolsatna khuopi Ariel in gimna thuoh ding hi! A kumkumin belap unlen, pawite bantai sah un.

²Hinanle Keima in Ariel lunggimsahin, tua munah kaana le mauna om ding a, Keima adingin Jerusalem[77] khu Ariel tawh a kibang ding hi.[78]

³Keima in David[79] bangin kang do nadingin giephuol ka sat ding hi; keima in tausangte tawh kang im ding a, nang do nadingin kanh ka to ding hi.

⁴Tua ciengin leithuh sung panin nangma in thu na gen ding a, leivui lah a ngiemna panin na thugente pusuoh ding hi. Sihla khat’ aw bangin lei panin nangma’ aw a pusuoh ding a, leivui lah panin na thugen ang dap ham ding hi.

⁵Ahi vangin na gal honpite[80] leivui nel a bang ding vua, a khansie mihonpite zong ansi leng bang ding uhi. Bakhat sung thakhatthu-in,

⁶Vanglien TOPA Pasien in vanto, zilling le a ging vapuoh, pumpei le huipi le, mi a halvam thei meikuong tawh dan a pie ding hi.

⁷Ariel sim dingin gam zosie panin mihonpite, a khuopi le ama’ mun muonhuoi a sim zosie le a lungkhamsah zosie pen mangmatna le zan lai-a mangmuna tawh kibang ding hi.

⁸A gilkiel mipa in a mang ah an ne-in, a khahlaw ciengin gilkiel veve a, a mangah a dangta mipa in tui dawn a, a dangta pha tuom loin, basamin a khahlaw ma bangin, Zion Muol a sim minam honpi zosie zong tua bang ahi ding uhi.

⁹No le no ki-amtum sah unlen, a amtumsa-in om un. No le no kimittaw sah unlen, a mittaw-in om un! Zu dawn lopi-in zukham unlen, zucia dawn lopi-in hawilen un!

¹⁰Bangzieh ahei cile TOPA in note tungah kimut duna hlagau a buosuh a, ama in no kamsangte’ mit ang sinpieh a, ama in no thumute’ lutang ang khumangpieh ta hi.

¹¹Note adingin tam teng zosie pen mangmuna sunga a kizielcip laibu sunga thu om tawh kibang ahi hi. Lai a sim theite kungah, “Tami lai sim un,” ci-a a kipieh ciengin amate in, “A kizielcip ziehin ka sim thei sih uhi,” a ci uhi.

¹²Tuale lai a sim thei lote kungah, “Tami lai sim un,” ci-a a kipieh ciengin amate in, “Ka sim thei sih uhi,” a ci uhi.

¹³TOPA in a gen hi: “Tam mite in a kam utawh keima kung ei nai vua, a nephu beh utawh keima ei patawi uhi, hizongle a lungtang uh pen keima tawh a kigamla hi. Keima ei biehna uzong mihing’ thupieh a zuina uh ahi lel bo hi;

¹⁴tuaci’n keima in tam mite tawh a lamdang nate le a cizathuoi le a lamdang nate ka bawlkia ding hi. A mipilte uh’ pilna kisie ding a, thu khinkhai theite’ thu khinkhaina kiselcip ding hi.

¹⁵TOPA thei lo dinga gelna thuhpi a selcip, khuomiel sunga a gamta, “Koi ahei ei mu ding? Koi ahiei ei thei ding?” a ci note in gimna na thuoh ding uhi!

¹⁶Note in nate lumlet sieng ta uteh! Belkheng pa khu tungman bangin a kingaisun ding amah? A kibawlsa na in a bawlpa kungah, “Ama in ei bawl sih,” ci-in, ahi sihle a kisiemsa na in a siempa kungah, “Ama in theitelna nei sih,” a ci ding amah?

¹⁷Lebanon muol pen leihoi mun suohsahin, leihoi mun gampalah a suo nading bakhat sung beh hi lo amah?

¹⁸Khum ni ciengin bilbingte in laibu kiziel sunga thute a za ding vua, lungzinna le khuomiel sung panin mittawte’ mit in khuo mu ding uhi.

¹⁹Mi neilutte in TOPA sungah a tha lungdam kipahna nga ding a, a tasam pente in zong Israel-te’ Siengtho Pa sungah lungdamin a kipah ding uhi.

²⁰Bangzieh ahei cile mi khansiete mangthai ding a, mi simmawte, sietna bawl ding a ngahlate om nawn lo ding hi;

²¹thukhenna zuma mi thu lelsah, khuopi tutkota thukhenpa a thangsie, thu omlo pi-a midihpa tungah a tanga thu khen nuom lote, kisumang ding hi.

²²Tua ziehin Abraham a hunpa TOPA in Jacob’ innkuon tawh kisai tam bangin a gen hi: “Jacob maizum nawn loin a mai zong kangdang nawn lo ding hi.

²³Bangzieh ahei cile amate lahah ka khutsuoh ahi a tate a mu ciengun ka min a siengthosah ding uhi.

²⁴Hlagau lama a khiel mite in theitelna a nei ding vua, a phunsie mite in thuhilna a sang ding uhi.