Read Zou ISAIAH 33 Bible Online

ISAIAH 33 - Zou bible

ISAIAH 33

¹Ang kisusie nai lo, mi a susie pa aw; koima’ lebawl ngai nai lo, mi lebawl pa aw, gimna na thuoh ding hi! Suhsiet ding na khawl ciengin nangma ang kisusie ding hi; tuale na lebawl nawn lo ciengin nang ang kilebawl ding hi.

²TOPA aw, kote ei hepi in; nang kang lamen uhi. Zingmawng sielin ka baantha-un hing pang inlen, ka lungkham hun ciengun ka kihutdamna uh hing hi ta’n.

³Mihonpi husa ziehin mite taimang hi; na thupina mai-ah minamte kithezah hi.

⁴Lungpuh in na a khop bangin galvanlahte kikhawm hi; kauphenote a kitom bangin a tungah amate a kitom[88] uhi.

⁵TOPA kitawisang a, a sangna munah ama a teng hi; ama in thutang le thudih tawh Zion kidimsah hi;

⁶na khan sungin ama khu dinkipna, hutdamna, pilna le theina hi ding a, TOPA giinna khu Zion’ gou ahi hi.[89]

⁷Ngai un! lamdungah galhangte a kiko uhi; kilemna palai semte nahpi tahin a kap uhi.

⁸Lam lienpite zui loin om a, khuolzinte zin nawn lo hi. Thukimnate kisusie-in, kiciemnate[90] kithusim lo a, mawpuohnate[91] zong khawh kisa ta lo hi.

⁹Gamsung zong kapin a thanem hi; Lebanon buoi-in a vulgawp hi; Sharon, senel gam tawh kibang hi; Bashan le Carmel muol in a singte a thing dawh uhi.

¹⁰“Tu-in ka ding ding hi,” TOPA in ci hi, “Tu-in kei le kei ka kidomsang ding hi; tu-in kei le kei ka kitawisang ding hi.

¹¹Ansi nau-in na paai vua, butu nau-in na suoh uhi; na husan uh pen no ang katum ding mei ahi hi.

¹²Mite pen suongkang kihalvam le lingkung kisattan mei-a kihaltum bang hi ding hi,” ci hi.

¹³No gamlapi-a om mite aw, ka silbawlte za un; no a nai-a omte aw, ka hatna ei theipi un.

¹⁴Zion ah mawneite a zau uhi; Pasien thei lote a citun uhi: “Eite lahah koi ahiei, ei katum thei mei tawh a tengton zo ding? Eite lahah koi ahiei, kumtawn meikuong tawh a tengton zo zing ding?” a ci uhi. Eite lahah koi ahiei, kumtawn meikuong tawh a teng zing zo ding?” a ci uhi.

¹⁵Dihtah le mantaha kalsuon, le thu a gen, bawlsietna tawh a kinga vante te thusim loin, guhgol sang nuom lo a, a khut a thing vazawh mite, sisansuona thu za nuom loin a bil a humte le, gitlona en nuom loin a mit a siingte,

¹⁶a sangna-ah a teng ding uhi; a kibuhna uh pen suong kulpite hi ding hi; a neh ding uh an kisih ding a, a dawn ding uh tui kitasam lo ding hi.

¹⁷Na mit un kumpipa’ hoina na mu ding uhi; zaipi taha kipha gam zong na gal-et ding uhi.

¹⁸Na lungsim un patauna thu a ngaisun ding hi: “Mi phaza a simpa hei-ah om ahei? Sieh kikhonte a te mipa hei-ah om ahei? galvilna tausang a sim pa hei-ah om ahei? na ci ding uhi.

¹⁹Note in a ham na theithei lo uh, a kitel lo kamham a zang, na thei lo uh kam a ham bielbuol mi kihisahte na mu nawn sih ding uhi.

²⁰I pawi bawlna uh khuopi Zion en vawi un! Daitaha a tenna mun, puonbuh a kikhin lona, a khetphimte a kidaw ngai nawn lona, a kaina khauhuol a kitan lona, Jerusalem khuopi khu na mit un a mu ding hi.

²¹Hinanle tuatah ah vanglien TOPA’ thupina khu eihaw-a’ hi ding a, gun golpite le luitate luonna mun ahi ding hi. Tua tuite tungah ei do gal gunkuong kihot nawn loin, gal tembawte zong a pei thei sih ding hi.

²²Azieh pen eite thu ei khen pa TOPA ahi a, eite uhpa zong hi hi. TOPA pen eite’ kumpipa ahi hi; ama in eite ei hundam ding hi.

²³Na tembaw khina khaute kol hi; tua in gunkuong puon khuom tukip zo lo a, gunkuong puon kizah thei lo hi. Tua ciengin neh ding le gal vanlah tampite kihawm ding hi; khelbaite nangawn in van a nga ding uhi.

²⁴Tua khuo sunga tengte in, “Kei ka ci na,” a ci sih ding uhi; tua sunga teng mite’ khielna kimaisah ding hi.