Read Zou ISAIAH 36 Bible Online

ISAIAH 36 - Zou bible

ISAIAH 36

¹Kumpi Hezekiah a uh kum sawm le kum li a cin kumin Assyria kumpipa Sennacherib in Judah gam sunga a om khuopi kulpi nei zosie sim dingin kuonto-in a la hi.

²Assyria kumpipa in Lachish khuo panin Jerusalem khuo-a kumpi Hezekiah kungah galkap honpi tawh Rabshakeh a sawl hi. Puonsawppa’ Lo zotna lam lienpi buol tungnung tuilahna gei-ah ama a ding hi.

³Tuale ama tawh kimu dingin Hilkiah’ tapa kumpi innsung vaipuo pa Eliakim, thuvanpi pa Shebna, le Asaph’ tapa thuciemte pa Joah a pusuoh uhi.

⁴Rabshakeh in amate kungah, “Hezekiah kungah tam bangin gen un: Kumpi lien Assyria kumpipa in tam bangin ci hi: Tami na kimuonna uh bang bulphu na hi uh ahei?

⁵Kamham maimaite po galdo nadinga vaihawmna le thahatna dan a na ngaisut amah? Tu-in kei nei ledo nadingun koi pen muong na hi uh ahei?

⁶En un, ama tunga a kingam mi khatpo’ khut a sun ding, pumpeng ciengkhut tawngsansa tawh a kibang ahi Egypt muong na hi lel bo uhi. Ama a muongte tungah Egypt kumpipa Pharaoh tua bang ahi lel hi.

⁷Hizongle note in keima kungah, “TOPA ka Pasien uh muong ka hi uhi,” a ci na hi uleh Hezekiah in a munsangte le a maitamte phelpiehin Judah le Jerusalem kungah, “Tam maitam mai-ah na bie ding uhi,” a ci pa hi lo amah?

⁸Tu-in hing pei unlen ka pupa Assyria kumpipa tawh kikhapna khat bawl un: No lam panin a tunga tuong ding mi na mu ngap po uleh sakol tulni kang pie ding hi.

⁹Egypt-te’ leengte le sakol galkapte muonna tawh ka pu’ nasemte a neupen lahah galkapmang khat nangawn bangci nan zo ding na hi uh ahei?

¹⁰Tham loin tami gam a susie ding le a do dingin TOPA lo tawh ang kuonto ka hi amah? TOPA in keima kungah, “Tami gam sim dingin kuonto inlen susie in,” ei ci hi.

¹¹Tua ciengin Eliakim, Shebna, le Joah in Rabshakeh kungah, “Kote in tel thei sam ka hi ziehun na nasemte Aram ham tawh ei hopi in; kulpi tunga om mite’ zahna-ah Judah ham tawh nei hopi lo nadingin kang thum hi,” a ci uhi.

¹²Ahi vangin Rabshakeh in, “Ka pupa in tami thu pen na pupa ule note kung beha gen dinga ei sawl ahi sih a, a eh uh ne a, a zun uh dawnin note tawh a mangthaitha ding ahi kulpi tunga a to mite kunga gen dinga ei sawl hizaw lo amah?” a ci hi.

¹³Tua ciengin Rabshakeh dingto-in Judah hamin nahpi tahin tangtawh a, “A lien mama kumpi, Assyria kumpipa’ thugente ngai un!

¹⁴Kumpipa in tam bangci hi: ‘Hezekiah kisolsah sih un, azieh pen ama in note ang hunkhie zo vawt sih ding hi.

¹⁵TOPA in ei hunkhie valon ding a, Assyria kumpipa’ khut sungah tami khuo kipie lo ding hi,’ ci-in Hezekiah in a gen ziehin na TOPA uh muong kha sih un.

¹⁶Hezekiah’ thu ngai sih un; bangzieh ahei cile Assyria kumpipa in tam bangci hi: ‘Keima tawh kilemna hing bawl unlen ka kungah hing pei un, tua ciengin a koima po in amau’ lenggui, amau’ theikung ciet panin ne-in amau’ tuikhuh ciet panin a dawn ding vua,

¹⁷keima hing pei-in, noma’ gam banga an le lenggazu a opna gam, moh le lengga huon a opna gamah kang peipi masangin a tua ci phot ding ahi hi.

¹⁸TOPA in eite ei hundam ding hi, ci-a Hezekiah’ ang genna po tawh ama kipuikhiel sah sih un. Minamte’ pasien-te khatpo in Assyria kumpipa’ khut sung panin a gam uh a hunkhie zo ngai mal amah?

¹⁹Hamath le Arpad-te’ pasien-te hei-a om ahi ta uh ahei? Sepharvaim gam pasien-te hei-ah a om vuoi? Amate in ka khut sung panin Samaria gam a hunkhie ta uh amah?

²⁰TOPA in keima’ khut sung panin Jerusalem a hutdam thei nadingin, tami gamte-a om pasien-te zosie lahah a koi pen in ka khut sung panin a gam uh hunkhie zo ding ahei?’ ci hi,” ci-in a gen hi.

²¹Ahi vangin kumpipa in, “Ama dawng sih un,” ci-in thupie ahi ziehin a sip dide vua, kam khat beh a dawng sih uhi.

²²Tua ciengin Hilkiah’ tapa, kumpi innsung vaipuo pa Eliakim, thuvanpi pa Shebna le Asaph’ tapa, thuciemte pa Joah in a puon uh balkehin Hezekiah kungah a haw vua, Rabshakeh’ thugen teng kumpipa kungah a genkia uhi.