Read Zou ISAIAH 38 Bible Online

ISAIAH 38 - Zou bible

ISAIAH 38

¹Khum hun lai-in Hezekiah a ci na-in si dihtah hi. Ama kungah Amoz’ tapa Isaiah haw a, “TOPA in tam bangin ci hi: Na innsung vai ding hawm in, azieh pen nang na si ding hi; na damkia nawn sih ding hi,” ci-in a gen hi.

²Tua ciengin Hezekiah in a mai kawm lam ngatin TOPA kungah thu ngen hi:

³“Nangma mai-ah thumaanna le lungsim zosie tawh gamta-in nangma muna-ah sil hoi ka bawl lam tu-in ei phawh in, kang thum hi, TOPA aw,” a ci hi. Tuale Hezekiah nahpi tahin kap hi.

⁴Tua ciengin Isaiah kungah TOPA’ thu a tung hi:

⁵“Pei inlen Hezekiah kungah gen in, na pu David’ Pasien TOPA in tam bangin gen hi: Na thungetna ka za zo a, na hlitui luongte ka mu zo hi; na hinkhuo kum sawm le kum nga kang belap ding hi.

⁶Keima in Assyria kumpipa’ khut sung panin nangma le tami khuopi kang hunkhie ding a, tami khuopi ka humbih ding hi.

⁷“Ama in ang ciemsa thu TOPA in ang sep nadingin tam pen TOPA kung panin nangma ading lim ahi hi:

⁸En in, keima in Ahaz kumpipa’ ni-nai tungah nitum kuona a liepsuh nihlim pen kal sawm ka nuatawn sah ding hi,” a ci hi. Tuaci’n ni-nai tungah a liepsa ni kal sawm a nuatawn hi.[100]

⁹Judah kumpi Hezekiah a ci na-in, a natna pan a dam zaw ciengin ama laigiel tami ahi hi:

¹⁰Ka khan kimsuh laitahin a muolliem ding ka hi ta hi; ka hun omlai teng zong khu Misikhuo tunkot zuon dinga ei kise ahi ta hi, ka ci hi.

¹¹A hingte’ gam sungah TOPA ka mu sih ding a, leitunga teng mite lahah mihing ka en nawn sih ding hi, ka ci hi.

¹²Tuucingpa’ puonbuh bangin keima kung panin ka tenna kiphelmangin kikhin ta hi; siemgan pa puon ziel bangin ka hinkhuo ka ziel zo ta hi; ama in siembu panin ei attan hi; nang in sun le zanin ka hinkhuo na tawpsah hi;

¹³zingmawng dongin huna ngenin ka kap hi; humpi bangin ka gu ka tang zosie na tawngsansah a, sun panin zan dongin ka hinkhuo na tawpsah hi.

¹⁴Sielpaleng bang le vakang bangin ka hamham a, vahui bangin zong ka maumau hi. Tunglam ka et-etna lamin ka mit khamzo ta hi. TOPA aw, kei ei kibawlsie hi; ka lungmuonna nangma hing hi ta’n!

¹⁵Hizongle ken bang gen thei ding ka hei? Azieh pen ama in tua thu ei gen zo a, amama in tam thu a bawl zo hi. Ka lunggim ziehin ka kimuthei sih hi.[101]

¹⁶TOPA aw, tam bang silte ziehin mite a nungta ahi vua, tamte zosie ka hlagau hinna ahi hi. Aw, keima ei damsah inlen, ei hingsah bo in!

¹⁷Hahsatna lienpi ka thuohna khu keima hoi nading tahtah ahi hi; hinanle nang in sietna dum sung panin keima’ hinkhuo nei nuatuh[102] hi, azieh pen nang in ka mawna zosie na nualamah nei paimangpieh hi.

¹⁸Azieh pen Misikhuo in lungdam ang ko thei sih a, sina in zong nang ang phat thei sih hi; Hankhuh sunga a kumsuhte in na muonhuoina a lamen thei sih hi.

¹⁹Tuni-a ka bawl bangin a hing mite, a hing mite beh in nangma kungah lungdam ang ko uhi; pate in a tate uh tungah nangma’ muonhuoina a theisah uhi.

²⁰TOPA in keima ei hundam ding a, tuale eite in TOPA’ inn sungah i hin sung tungtawnin khausai tumgingte[103] tawh la i sa ding uhi.

²¹Tu-in Isaiah in, “Amate theiga lomkhat lasah inlen, a himate uh a damkia thei nadingin nupieh in,” a ci hi.

²²Hezekiah in zong, “TOPA’ inn sungah ka peito nading bang lim hi ding ahei?” ci-in a dong hi.