Read Zou ISAIAH 40 Bible Online

ISAIAH 40 - Zou bible

ISAIAH 40

¹Aw, ka mite henem un, henem un, na Pasien un ci hi.

²Awnem no tawh Jerusalem hopi unlen, a thuoh ding hun ciengtan cing zo a, a mawna thaman kipie zo hi. A mawna zosie ziehin TOPA’ khut tung panin a zani-in ama in thuoh zo hi, ci-in ama kungah kiko un.

³A kiko awging khat in: “Gampalah ah TOPA pei nading lampi siel unlen, senel gam sungah i Pasien adingin lam lienpi na tangsah un.

⁴Guom zosie kisangsah ding a, muol le tang teng zosie kiniemsah ding hi; lei kituoh lote kitotam ding a, leiphom munte zanglei suoh ding hi.

⁵Tua ciengin TOPA’ vang ang kitalang ding a, TOPA’ kam in a gensa ahi ziehin, mi zosie in a muton ding uhi,” a ci hi.

⁶Awging khat in, “Kiko in!” ei ci hi. Tuale keima in, “Bang thu kiko ding ka hei?” ka ci hi. Mi zosie lopa bang ahi a, a bulkip dan uh pen gamlah paape tawh kibang hi.

⁷TOPA’ hu in a mut ciengin, lopate vulin paapete a muol hi; a tahtahin mihingte lopa bang lel ahi hi.

⁸Lopate vul a, paapete a muol hi; ahi vangin i Pasien uh’ kammal ahile a kip tawntung ding hi.

⁹Lungdamna thu[104] a puoh Zion aw, muolsang dawnah kato in; lungdamna thu[105] a puoh Jerusalem aw, na tha nei za-in awng in, na aw sangsah inlen zau sin; Judah khuopite kungah, “Tanah na Pasien uh a om hi!” ci un.

¹⁰En un, thahatna tawh TOPA Pasien ang pei a, ama in ama adingin a khut tawh vai a hawm hi. Ama’ sep thamante ang puo a, a lokiana ding ang masot hi.

¹¹Ama in tuucingpa bangin a tuute an a va ding hi; ama in a banah tuunote huoi-in, a kangah tuate pom ding a, a nosen neite zong damtahin a peipi ding hi.

¹²Koi in a khutkuoh tawh tuite te-in, a khap tawh vante ciemte a, koi in a tena sungah leitung leivui guongin, muolte pongkhaina tawh khai a, koi in muoltangte tawitena tawh te ahei?

¹³Koi in TOPA’ hlagau lamlah a, ama’ thu kuppipa in ama a hil bangin koi in ama thu hil ahei?

¹⁴Thu a thei nadingin ama in koi dong a, koi in ama thutang lampi hil ahei? Koi in ama theina hil a, koi in ama theitelna hil ahei?

¹⁵Minamte nangawn phelkhai khat pana tuimal hlitaa tawh kibang lel a, tawitena tunga leivui baang bangin kingaisun lel hi; en un, ama in leivui them bangin tuikulte a domto lel hi.

¹⁶Meitaw nadingin Lebanon sing in sih zo lo ding a, a ganhingte zong kicing lo ding hi.

¹⁷Ama mai-ah minam zosie bangma hi lo hi; ama in bangma lo le a hawmguoh sanga a tawmzaw-in amate a ngaisun hi.

¹⁸Tua ahile note in Pasien koi tawh tekah ding a, ama tawh tekah dingin a kisutpi bang pen ahei?

¹⁹Milim khat po amah? -tua pen milim bawlpa khat in sung a, tuale khamkheng pa khat in kham tawh zutzol a, tuami adingin ama in ngun khainiengte sunpieh hi.

²⁰Letsong dingin mite in a muot lo ding nailung sing[106] a teel uhi, tua ciengin a pua lo ding milim khat a phut dingin amate in khutsiem mi khat a sui uhi.

²¹Note in na thei nai sih uh amah? za nai lo na hi uh amah? A cila patin note kungah hing kigen zo hi lo amah? Note in leitung piencila kipanin, thei zo ta hi lo uh na mah?

²²Leitung vielkuol tunga a to pa ama ahi a, a sunga tengte pen kauphe tawh kibang hi; ama in puonkhai bangin vante zah a, ten nading puonbuh bangin tuate a zah hi;

²³ama in uliente amawhna suohsah a, leitung a uhte bangma lo suohsah hi.

²⁴Amate a gina-in kisuon lo a, amate a gina-in kivaw lo hi. A huite uh lei-ah zung hla loin ama in a mut ciengin a vul vua , huipi in butu bangin amate a tawmang hi.

²⁵Tua ahile kei koi tawh ei tekah ding na hi uh ahei? Ahi sihle ka kikimpi koi pen ahei? Siengtho Pa in ci hi.

²⁶A sangna lam ento unlen mu un: Koi in tam teng siem ahei? Ama in a honpite pui-in a phaza simin a min cietin hlan hi; ama thahatin a vangliet ziehin a pelem khat beh a om sih hi.

²⁷“TOPA kung panin ka lampi kiselmang a, ka Pasien in ka thumanna ei thudon lo hi,” Jacob aw, bang dingin ci-a, Israel aw, bang dingin tuaci ham na hei?

²⁸Na thei nai sih uh amah? Na za nai sih uh amah? TOPA khu kumtawn Pasien ahi a, leimongte a siempa ahi hi. Ama basam lo a, zong gim lo hi; ama’ theitelna ahile sui zawh vet ding ahi sih hi.

²⁹Ama in a bate tungah thahatna pie a, thahatna nei lote a tha hatsah hi.

³⁰Khangnote nangawn ba-in gim ding a, tuoilaite a husam ding uhi;

³¹hinanle TOPA a lamen mite ahile a tha uh dimkia ding a, muvanlai bangin a hla tawh lengto-in, amate tai napi a gim sih ding vua, amate lam pei napi a ba sih ding uhi.