Read Zou ISAIAH 41 Bible Online

ISAIAH 41 - Zou bible

ISAIAH 41

¹Tuipi gei-a om gamte aw, daitahin ka thu ngai un; mite a tha dimkiasah un; amate a nai-ah hing peisah unlen, tua ciengin amate hing gensah un; thu kinei dingin i kinai ciet ding uhi.

²Nisuona pana ang pei a guolzo mipa, koi in nasem dingin ama hantawhin, koi in ama hlan ahei? Ama in a sungah minamte pie a, ama in a keng tawh kumpite tuoncil hi; ama in a namsau tawh amate leivui bangin bawl a, a thalpi tawh bukung huimut leng bangsah hi.

³Ama in a kenga a pei ngai lona lampi ah amate nuadelin nuomtahin a peisuoh hi.

⁴A kipat cil a kipanin a khangkhangin mite a hlan, tami nasep sem a, a bawl koi ahei? Keima, TOPA khu a masa pen ka hi a, tuale a nukhia pen tawh ka omton ding hi.

⁵Tuipi gei-a om gamte in mu-in a zau vua, leimonga teng mite a citun uhi; amate in nai-in a pei uhi.

⁶Khatlekhat a kipanpi vua, khatlekhat “hangsan in,” a kici uhi.

⁷Khutsiem pa in khamseh pa hanthawn a, sehta tawh milim a suizol pa in lungthang tunga a sat pa hanthawn a, a sumtui luonna uh, “Hoi hi,” a ci uhi. Amate in a kilawh thei lo dingin tua milim siakil tawh a khendet uhi.

⁸Hinanle nang ka nasem pa Israel, kang teelsa Jacob, ka guolpa Abraham’ hlahlesuon;

⁹leimong pana kang lah dawh, gammong a gamla pen pana kang hlat, “Nang ka nasem pa na hi a, nangma kang teel zo ta a, nang kang nuol sih hi,” kang ci pa aw;

¹⁰nang kang ompi ziehin zau sin, na Pasien ka hi ziehin patau sin; keima in nang hing thakhausahin kang panpi ding a, ka galzawna zietlam khutin kang tu lenlon ding hi.

¹¹Hi hi, nang tunga a lungthah zosie maizumin a zala ding uhi; nang ang demte bangma suohin, a mangthai ding uhi.

¹²Na kihaupite na sui vangin, amate na mu sih ding hi; nangma ang dote bangma a suoh vawt sih ding hi.

¹³Azieh pen keima TOPA na Pasien in nangma’ zietlam khut ka tu hi; “Zau sin, kang panpi ding hi,” ci-a na kunga ang ci pa keima ka hi hi.

¹⁴Lungno bang lel Jacob, no a neu Israel-te aw, zau sih un! Keima in note kang hu ding hi, TOPA in ci hi; note ang Tankhie Pa pen Israel-te’ Siengtho Pa ahi hi.

¹⁵Tu-in note pen a hiem, a tha le ha a nei bucilna bangin kang bawl ding hi; note in muol golte cilin na gawtvui ding vua, muoltangte zong ansi bangin na bawl ding uhi.

¹⁶Note in ansite na khap ding vua, hui in tuate tawmang ding a, huipi in tuate a thezah ding hi. Tua ciengin TOPA sungah na lungdam ding uhi; Israel-te’ Siengtho Pa sungah note na kisiel ding uhi.

¹⁷Mizawngte le mi tasamte in tui a sui ciengun bangma om lo a, tuidu-in a lei uh a gaw a, keima TOPA in amate ka dawng ding a, keima Israel-te’ Pasien in amate ka nuasie sih ding hi.

¹⁸Muolsang pawn[107] tungah guntui ka luongsah ding a, kuomte laikimah tuisam ka pulsah ding hi; senel gam pen buoltui ka suohsah ding a, gam gawta pen ciatui ka suohsah ding hi.

¹⁹Senel gam sungah taamtah sing, gising, muising, le olive kungte ka posah ding hi; senel gamah taasing, hiengpa sing, meigit singte ka suonton ding hi.

²⁰TOPA’ khut in tami bawl a, Israel-te’ Siengtho Pa in tami piengsah hi, ci-in thei-in a mu thei nading, mi zosie in lung ngai-in a theisiem nading uh ahi hi.

²¹Na thu uh sung un, TOPA in ci hi; na cienlah nuom teng uh hing puoh un, Jacob’ Kumpipa in ci hi.

²²Amate in tuate puoh uh hinlen, a pieng ding thu gen uheh. Kote in tuate khu ngaisunin a pieng ding thu ka thei nadingun a piengsa thute bang teng ahei ei gen uheh; ahi sihle ang pieng ding thute ei gen ta uheh.

²³Note pasien-te na hi lam uh keima in kang thei nadingun, tu zaw cienga ang pieng ding thute kote kungah ei gen uheh; kote patau-in ka zau nadingun a pha ahi a, a sie ahi zongin hing bawl un.

²⁴A tahtahin note bangma na hi sih vua, na nasepnate uh bangma ahi sih hi; note ang teel pa a kidahhuoi ahi hi.

²⁵Leilu lam pan mi khat ka hantawh a, ama ang kuon zo hi, ama in nisuona lam panin ka minin[108] ei hlan ding hi. Beelkheng pa in buon a cil bang, sum sunga kisuguoi bangin, ama in gam uhte a tuoncil[109] gawp ding hi.

²⁶Ka thei nadingun a cil panin koi in ei gen a, “Ama thuman hi,” ka ci thei nadingun, koi in ei magen ahei? Koima in genkhie loin pulah lo a, koima in na gen uh za lo hi.

²⁷Keima in Zion[110] kungah tam thu ka pulah masa a, Jerusalem tungah lungdamna thu gen tangko khat ka pie hi.

²⁸Ka et mawh vangin koima om lo hi. Thu ka dawh ciengin ei dawng ding, thu ka kikuppi ding amate lahah koima om lo hi.

²⁹Hi lo hi, tuate a unpi-in a zuou bulompi ahi hi; a nasepte uh bangma hi lo a, a milimte uzong hui hawmpi ahi bo hi.