Read Zou ISAIAH 45 Bible Online

ISAIAH 45 - Zou bible

ISAIAH 45

¹Ama mai-ah minamte a zogawp ding le kumpite’ puontuolte hawhpieh ding, khuopi tunkotte a kikha lo nadinga a mai-a kotpite a hong ding, a zietlam khut ka tuhpieh, a sathau nu pa Cyrus kungah TOPA in tam bangin gen hi:

²Na mai-ah pei-in muolte[119] ka zezang ding a, sumngo kotpite susie-in, sia zawlte sattanin,

³nangma’ min tawh ang hlanpa khu Israel Pasien TOPA keima ka hi lam na thei nadingin, khuomiel sunga kikoi goute le mun simtham sunga a kidap koi haunate kang pie ding hi.

⁴Ka nasempa Jacob zieh le ka teeltuom Israel ziehin keima in na min tawh kang hlan a, nang in kei nei thei lo vangin keima in patawina za nang kang pie hi.

⁵Keima TOPA ka hi a, koima dang om lo hi; Keima simlo pasien dang om lo hi. note in kei ei thei sih nan locin, keima in note galhiem kang guon hi.

⁶Nisuona lam le nitumna lam panin keima simlo koima dang a op lo lam amate in a thei nadingun, TOPA khu keima ka hi a, koima dang a om sih hi.

⁷Keima in khuovah ka bawl a, khuomiel zong ka siem hi; keima in nopsahna ka siem a, lungkhamna zong ka siem hi; tam nate zosie a unpi-a a siem pa khu keima TOPA ka hi hi.

⁸Vantungte aw, tung lam panin zusah un, vantungte in dihna gua bangin zusah un; hutdamna a phulto thei nadingin[120] leitung kihongsah unlen, tua in dihna zong a posah thei nadingin, keima TOPA in tua khu ka siem zo hi.

⁹Nangma ang Bawlpa tawh a kihau mi pa, beelkheng[121] pa tawh a kiledo leibeel in gimna nga taheh! Tungman in a khengpa kungah, “Bang bawl na hei, ahi sihle, “Na sil bawl in a tuhna nei lo hi,” ci-in a gen amah?

¹⁰A pa kungah, “Nang in koi na piengsah ei?” a cipa hi tale, numei kungah, “Nang in nausuoh dingin bang pen gimpi na hei?” a cipa in gimna thuoh taheh!

¹¹Ama a Bawlpa, Israel-te’ Siengtho Pa, TOPA in tam bangin a gen hi: “Nang in keima’[122] tate thu ei dong a, ahi sihle ka khut tawh ka silbawl tawh kisai thu ei pie ding na mah?

¹²Keima in leitung ka bawl a, tua tungah mi ka siem hi; vantungte a zah khu ka khutte ahi a, keima in vantung na honpite zosie thu ka pie hi.

¹³Dihna lamah Cyrus[123] ka cil a, keima in ama’ lampi zosie ka tangsah ding hi; ama in nasep manh ding ahi sihle thaman a dei zieh hi loin, ka khuopi lam ding a, saltang ka mite hla ding hi,” Vanglien TOPA in ci hi.

¹⁴TOPA in tam bangin gen hi: Egypt’ hauna le Ethiopia[124] sumbuh vante le na kungah a tunsang Seba mite hing pei-in, nangma-a’ ang hi ding vua, nangma’ nua ang zui ding uhi; siakol bulsa-in amate ang pei-in na mai-ah ang kun ding uhi. Amate in nangma kungah thumna ang nei ding vua, “Nangma beh tawh Pasien omton a, koima dang a om sih hi; ama simlo pasien dang om lo hi,” ang ci ding uhi.

¹⁵A mantahin, Israel-te’ Pasien, hundampa aw, nangma a kiphuol Pasien na hi a,

¹⁶amate a unpi-un zumin a zala gawp vua, milim bawlte zong amtawngin a peiton uhi.

¹⁷Hinanle TOPA in kumtawn hutdamna tawh Israel a hundam hi; note in maizum thuoh loin, kumtawnin zong na zala sih ding uhi.

¹⁸Bangzieh ahei cile vantungte a siempa (ama Pasien ahi hi!) leitung a siem pa le a bawl pa (tua khu a kipsah pa; ama in tua khu buoi nadingin siem loin, ten nadinga a bawl pa!) TOPA in tam bangin a gen hi: Keima TOPA ka hi a, koima dang om lo hi.

¹⁹Keima in khuomielna gam sungah thu ka dapgen sih hi; Jacob’ suonlehlahte kungah, “Buoina lahah kei ei sui in,” zong ka ci sih hi. Keima TOPA in thuman ka gen a, thudih ka tangko hi.

²⁰Minamte lahah a suohtate aw, kikhawmin peiton unlen, ei nai un! A sing milimte uh a puo kawikawi-te in theina a nei sih vua, a hundam thei lo pasien kungah thu a ngenngen uhi.

²¹Pholah unlen, na thu uh sung un; amate kikumtonsah un! Sawtveipi lai-in tami koi gen ahei? Tanglai-in koi in a gen ahei? Keima TOPA hi lo ka mah? Keima simlo pasien dang om lo a, a dih Pasien le Hundampa khat a om hi; keima simlo pasien dang om lo a, keima sim koima dang om lo hi.

²²Leimong a om mi zosie aw, keima lam hing kihei unlen hutdamin om un! Azieh pen keima Pasien ka hi a, koima dang om lo hi.

²³Kei le kei ka kiciem zo a, dihna ziehin ka kam panin ang kinuale lo ding le ang pusuoh ding thu in: “Keima kungah mi zosie ang khupdin ding a, lei zosie ang kiciem ding uhi,” a ci hi.

²⁴TOPA sung behah dihna le thahatna om hi, ei kici ding hi; ama tunga a lungthah zosie ama kungah ang pei ding a, amate kimaizumsah ding hi.

²⁵TOPA sungah Israel’ suonlehlahte zosie guolzo-in a kisiel ding uhi.