Read Zou ISAIAH 47 Bible Online

ISAIAH 47 - Zou bible

ISAIAH 47

¹Ngahnu siengtho Babylon tanu aw, kumsuh inlen leivui lahah to in! Chaldea tanu aw, kumpi topha a op lona lei lahah tosuh in! Bangzieh ahei cile nang a khangmoi, a ngeh dihdeh ang kici nawn sih ding hi.

²An gawina suongte la-in an gawi inlen, na kikhuna puon ladawh in. Na puontuol sutin, na keng dawhsah inlen, gunte kantan in.

³Guohtang na hina khu loin a om ding a, na zumhuoina teng kimu ding hi. Keima in phu ka la ding a, koima ka hinkhawi sih ding hi.

⁴Eite’ Tanpa, ama’ min pen Vanglien TOPA, Israel-te’ Siengtho Pa ahi hi.

⁵Chaldea’ tanu aw, dai tahin to inlen, khuomu lahah pei in! Bangzieh ahei cile nang pen kumpi gamte’ kumpinu ang kici nawn sih ding hi.

⁶Ka mite tungah ka lungthah a, ka gouluo ka buasah hi; na khut sungah amate kang pie a, amate tungah hepina na lah sih hi; khanghamte tungah a gih mama dingin na hahkol na bawl hi.

⁷Nang in, “Kumpi nu hi zing na vang,” na kici a, tuaci’n tam thute ngaisun loin a thumong zong na phawhkha sih hi.

⁸Tua ahi ziehin tu-in nang a noptat, lungmuong taha a to hit hiet, na lungsim sungah, “Keima ka hi hi, keima lo koima om lo hi; meigongin to sih vangin, tate zong sisuo sih vang,” a ci nu in tam thu ngai in.

⁹Bakhat, ni khat sungin na tungah tamte gel ang tung ding hi: Aisan siemna le mibum siemnate nasie tahin nei nan lacin nang tungah ta le naute sina le meigonna ang tung veve ding hi.

¹⁰Na gitlona-ah na lungmuong hi; “Koima in kei ei mu sih,” na ci hi. Na pilna le na theina in nang ang puikhiel ta a, tuale na lungsim sungah, “Keima ka hi, kei simlo midang om sih,” na ci hi.

¹¹Hizongle na damsah thei lo sietna na tungah ang tung ding a, na mansah thei lo gimna na tungah ang tung ding hi; na tungah na theikhah lo manthaina thakhatthu-in ang tung ding hi.

¹²Na neulai pana na sep na mibumna le na aisannate ah kiptahin om in; nang in na muolsuo kha thei ding a, mite na zausah kha thei ding hi.

¹³Na thu kikuppi mi tampite ziehin na lung a gim mama hi; vantung nate kanin[128] aasi zong enin, hladet siela nangma tungah bang[129] thu pieng ding ci thu ang magen mite dingsah inlen, kihundamsah in.

¹⁴En in, amate bukung tawh kibang a, mei in amate a katum sieng hi; meikuong’ hatna panin amau le amau a kihun thei sih uhi. Tam pen khuolum nading mei-am hi lo a, a mai-ah to-in awi ding mei zong hi lo hi!

¹⁵Na neu lai pana na sum suipi, na septonpi mite in nang tungah ang sep hu thei tam bang teng ahi hi; amate a lampi cietah a vahthap vua, nang ang hundam ding koima om lo hi.