Read Zou ISAIAH 49 Bible Online

ISAIAH 49 - Zou bible

ISAIAH 49

¹Tuipi gei-a om gamte aw, ka thu ngai unlen, no a gamlapi-a omte aw, na bil hing daw un! TOPA in ka suo masangin keima ei na hlan zo a, ka nu sunga ka op lai-in ka min ei na phuo zo hi.

²Ama in ka kam, namsau tat hiemsa bangsah a, ama’ khut hlim sungah keima ei phuol hi. Ama in a kinawt ngil thaltang bangin keima ei bawl a, ama’ thaltang lawng sungah keima ei phuol hi.

³Ama in keima kungah, “Ka nasem Israel na hi hi; nangma ziehin ka minthang ding hi,” ei ci hi.

⁴Ahi vangin keima in, “Amawhna-in na ka sem a, bangma lo le amawhna-in ka thatang ka zang hi; hinanle pel loin ka vai teng TOPA kungah om a, ka thaman zong ka Pasien kungah om hi,” ka ci hi.

⁵Ama kungah Jacob kipeipi kia-in, ama kungah Israel-te a kisuhtuo thei nadingin TOPA muna-ah ei kipatawi a, Pasien pen ka thahatna suohin, ama nasem dingin ka nu sungah keima ei piengsah TOPA in tu-in thu a gen hi.

⁶Ama in, “Jacob minamte a lamto ding le Israel a suohtate a ngai bangsahkia dingin, ka nasem pa na hina pen a bailam no khat ahi hi. ka hutdamna in leimong dong a phah thei nadingin minamte tunga khuovah ahi dingin nang kang pie ding hi,” ei ci hi.

⁷Israel a Tanpa le ama’ Siengtho Pa ahi TOPA in nahpi taha a kisimmaw, minamte’ huot bawl, gam uhte’ nasempa tungah, “Nangma ang teel a muonhuoi TOPA, Israel-te’ Siengtho Pa ziehin, mite na hutdamna thu kumpite in ang mu ciengun ang dingto ding vua, uliente amau le amau ang khupbawh ding uhi,” ei ci hi.

⁸TOPA in tam bangin gen hi: Ang angvan hunin keima in nang kang dawng zo a, hutdamna ni-in nang kang panpi zo hi; keima in note kang kem a, mite dinga thuciemna banga kang pieh na hi a, nang in gam na phu nading le a kinuasiesa goute na hawmpieh nadingin,[133]

⁹thongkiate kungah, “Hing pusuoh un,” ci-in, miel lahah a om mite kungah, “No le no hing kilah un,” ka cisah ding hi. Amate in lampi dungah an a ne ding vua, muolvum pawn[134] zosie a an maina uh hi ding hi;

¹⁰amate gilkiel loin, a dangta sih ding vua, huisa le nisa zong a thuoh sih ding uhi, azieh pen amate a khuotuo pa in amate mapui ding a, ama in tuinah pulna munah amate a peipi ding hi.

¹¹Ka muol teng zosie lampi ka suohsah ding a, ka lam lienpite ka sangsah ding hi.

¹²En un, a gamlapi panin tamte ang pei ding vua, en un, tamte leilu lam le nitumna panin ang pei-in, Syene[135] gam panin tamte ang pei ding uhi.

¹³Vantungte aw, kipahin la sa unlen, leitung aw, lungdamin dieng in; muolte aw, awngin la sa un! Azieh pen TOPA in mite hlamuon zo a, gentheina a thuohte tungah lainatna nei ta ding hi.

¹⁴Hinanle Zion in, “TOPA in kei ei nuasie zo a, ka TOPA in kei ei mangngil zo ta hi,” a ci hi.

¹⁵Numei in nawitep lai a ta mangngil thei-in, a sunga pieng a tapa khuotuo loin a om thei ding amah? Tamte nangawn in mangngil kha thei ding a, hinanle ken note kang mangngil sih ding hi.

¹⁶En un, ka khutphang gel sungah nangma kang giel zo ta a, na kulpi bangte zong ka mai-ah a om zing hi.

¹⁷Ang lam mite ang susiete[136] sangin hatzaw a, ang susiete in ang peisan ta uhi.

¹⁸Na kimvelah khuodahin en in; amate a unpi-un a kikhawmin na kung ang zuon uhi. TOPA in a genna ah, keima a nungta ka hi ma bangin, kizepna bangin tuate na sil ding a, motha bangin tuate na sil ding hi.

¹⁹A kilawisa le a daidamsa na munte le a kisiecip nangma’ gamte- na sunga a tengte adingin tu-in ahile ang kuocih valon ding a, nangma ang valtumte gamlapi-ah a om ding uhi.

²⁰Na da hun sung vua a pieng na tate in na zahna vuah, “Kei adingin mun kawcih luo hi; ka ten nading uh mun ei bawlpieh in,” ang ci ding uhi.

²¹Tua ciengin na lungsim sungah, “Tam mite koi’ hinsah ahiei? Da le mau-in ka ciing a, salin ei kikaimang hi. Tuaci’n tamte koi’ kep adiei? Kei guohin ei kinuasie a, tam mite hei sung pana ang pei uh ahi diei?” na ci ding uhi.

²²TOPA Pasien in tam bangin gen hi: A sawt loin minamte tungah ka khut ka lamto ding a, mite adingin ka lim ka khai ding hi; amate in a kang sung vuah na tapate uh tawi-in ang puoh ding vua, amate in na tanute uh a liengko vuah puo-in ang puoh ding uhi.

²³Kumpite pen note ang kem na pate suoh ding a, kumpinute zong note ang khoi na nute suoh ding uhi. Amate in a mai uh tuol lam ngatin nang kungah a khupbawh ding vua, amate in na kephanga leivui baangte ang liepieh ding uhi. Tua ciengin note in TOPA ka hi lam nei thei ding uhi. Keima ei ngahte in zumna a thuoh sih ding uhi.

²⁴Mihat pa kung panin amau’ samat kilahpieh zo a, mi zothaw pa[137] in sala a mat mite a kihunkhie zo amah?

²⁵Hizongnanle TOPA in tam bangin a gen hi: Mihatpa’ mat salte nangawn kiladawh ding a, mi zothaw pa’ samat zong kihunkhie ding hi; bangzieh ahei cile nangma ang dem mite keima tawh ka kidem ding a, na tate ka hundam ding hi.

²⁶Nang bawlsie mite in amau’ sa ka nesah ding a, zukham bangin amau’ si ma dawnin a kham ding uhi. Tua ciengin kei pen Jacob’ Vanglien Pa, nang ang Tankhie pa, nang ang hunpa TOPA ka hi lam mi zosie in ei thei ding uhi,” a ci hi.