Read Zou ISAIAH 5 Bible Online

ISAIAH 5 - Zou bible

ISAIAH 5

¹Ka lawm it pa tangin a lenggui lo tungtang ka zawlla sa vang: Ka lawm it pa in lei hoi mama na muol tung khatah lengga lo khat nei hi.

²Ama in lei to-in suongte paidawh a, a deiteel lengguite a suon hi; a laikimah dawsang khat lam a, tua sungah lengga tui hlawhna khuh khat to hi; lengga hoi a ga dingin ama kinem a, hinanle gam lengga a ga mawh hi.

³Tu-in Jerusalem-a tengte le Judah mite aw, keima le ka lengga huon kikalah thu khen vawi un.

⁴Ka lengga huon sungah ka bawl nai lo tuami adingin ka bawl ding bang omlai ahei? Lengga hoi ga ding ka kinep laitahin bang dinga gam lengga po ga zawsop ahei?

⁵Tu-in na kungah ka lengga huon tunga ka bawl dan ding kang gen ding hi. A daithaw ka ladawh ding a, tua khu a kinemang ding hi; a pal ka phelkhe ding a, tua khu kituoncil ding hi.

⁶Keima in lotul ka suohsah ding hi; tua khu hui lo tuh loin om ding a, tua lo sungah ling le khaute khangin a depmang ding hi; Keima in a tungah guo a zuh lo nadingin meiilumte thu ka pie ding hi.

⁷Azieh pen Vanglien TOPA’ lenggui huon khu Israel innkuonte ahi vua, Judah mite pen ahile lungkima a suon kungte ahi uhi; ama in thutang a lamen a, hizongle sisan luonna a mu hi; ama in thutang a lamen a, ahi vangin kaana a za hi!

⁸Gam laizangah noma guoh a teng ding dan khatin, noma ding ci simlo midangte dinga mun bei vawt za dongin inn a lei bebe mite le lo keh bebete khu mi hamsie ahi hi!

⁹Vanglien TOPA khu ka zahna-ah a kiciem zo hi: Inn tampi hawmsuoh valon ding a, inn gol le inn hoite sungah koima teng lo ding hi.

¹⁰Azieh pen lengga huon eka sawm in bath khat maimai ga ding a, khaici homer khat in an ephah[8] khat maimai a piengsah ding hi,” ci hi.

¹¹Zingmawng thobai-in khamtheizu delin, lenggazu in amate a satsah vapual masangsie, zankhang a a tokho mite in gimna a thuoh ding uhi!

¹²Amau’ pawi sungah lyre lasahna le harp, tawm, theile le zu ciate kihal a, ahi vangin amate in TOPA’ sepnate a thusim sih vua, ama in a khuta a bawlte zong amate in a mu sih uhi!

¹³Tua hi a, thei lona ziehin ka mite salin kikai ta hi; a miliente uh a kielsi vua, amau’ mihonte ahile a dangta-in a kihulvam uhi.

¹⁴Tua ahi ziehin Misikhuo[9] dugawna khangsahin bangma tawh a kite thei lo za-in, a kam a kah piehpuoh hi. Jerusalem’ thupina[10] le a mipite, ama’ sunga a nuomsa a mihonpite a sungah a lutsuh sieng uhi.

¹⁵Mite kilukunsahin mi zosie kingiem koi a, mi kiliensahte a mitkhup sa-in ki-omsah hi.

¹⁶Hinanle Vanglien TOPA ahile a thutang sep ziehin kitawisang a, a Siengtho Pasien in dihtatna tawh a sienthona a lah hi.

¹⁷Tua ciengin a tatna uh lodawng mun bangin tua khuo sungah tuunote in lopa mai ding a, gan kivathaute le tuunote[11] in a siesa khuopite lahah gamta ding uhi.

¹⁸Zuouna khaute tawh khielna kai a, leng khauhuol tawh mawna a kai note in gimna na thuoh ding uhi.

¹⁹“Ei mu thei nadingin ama kinawsahin, ama’ nasep mallangsah vai. Eite in i theithei nadingin, Israel Siengtho pa’ gelna a tangtun thei nading kinawsah vai!” na ci uhi.

²⁰A hoi lote a hoi ci a, a hoite hoi lo ci-in, khuovah tangin khuomiel koi a, khuomiel tangin khuovah koi-in, a hlum tangin a kha koi a, a kha tangin a hlum a koi note in gimna na thuoh ding uhi!

²¹Noma’ mitah pil kisa-in noma’ muna-ah siem a kisate in gimna na thuoh ding uhi!

²²Zudawn lama a kipasalsahte, le za tawh a kihal khamthei zudawn hatte,

²³mawnei mite guhgol tawh hla a, mawpengte’ nga dingte a lahpieh note in gimna na thuoh ding uhi!

²⁴Tua ahi ziehin meikuong in bukungte katum a, mei sungah lopa gawte a kahtum bangin a zungte muotmang ding a, leivui bangin a pavuite a lengto ding hi; bangzieh ahei cile amate in Vanglien TOPA’ thuhilna a niel vua, Israel Siengtho pa’ kammal a simmaw uhi.

²⁵Tua ahi ziehin a mite tungah TOPA’ lungthahna kikuontaw-in, amate langkhatah a khut lamin amate a vatmai hi; muolte kithing a, lampi dung tengah a luonghawmte uh, buathah bangin a om hi. Azieh pen tam teng zosie ziehin a lungthahna kiheimang tuom lo a, ama’ khut a kizah lai hi.

²⁶A gamlapi-a a om minam khat adingin ama in lim khat khaito ding a, leimonga omte adingin khutkawi tumin, mallangtah le gangtahin amate a pei pai uhi!

²⁷Amate a gim om koima loin, koima a kipai sih uhi. Koima lusu loin, koima kimu lo uhi. Kawnggah puonte kol loin, kedap khau khat zong tat lo hi;

²⁸a thaltangte uh hiem thei mama a, a thalpite uh kuoisa-in a om hi. A sakol kecinte uzong khu meituh suong bang a, tuale a lengpeite uzong pumpei tawh kibang hi.

²⁹Amau’ hawh vapuoh khu humpi hawh tawh kibang a, a hawh vapuoh a khangdawng humpi tawh a kibang uhi; amate in ngih kawmin a neh ding uh sa man a, amate in tua khu a kipuoh dawh vua, koima in a hun zo sih hi.

³⁰Tua ni ciengin tuipi ging bangin amate tungah ging ding a, tuale mite in gam sung a et ciengun khuomiel le lungzinna beh a om hi; meii in khuovah a mielsah hi.