Read Zou ISAIAH 52 Bible Online

ISAIAH 52 - Zou bible

ISAIAH 52

¹Zion aw, khanglo in, khang lo in, thahatna puon sil in! Khuopi siengtho Jerusalem aw, na puon hoite sil in; azieh pen nangma sungah tep tan lote le a bua mite ang lut nawn lo ding hi.

²A kiman[145] Jerusalem aw, leivui panin kithing inlen ding in. A kiman Zion tanu aw, na ngawnga ang kikhina khaute sut in!

³Azieh pen TOPA in tam bangin ci hi: Bangma loin ang kizua a, sum pieh loin ang kitan ding hi.

⁴Bangzieh ahei cile TOPA Pasien in tam bangci hi: Hun sawtpi lai-in Egypt ah pemta-in ka mite a na peisuh uhi; Assyria-te in a thu om lo pi-in amate na bawlsie uhi.

⁵Ka mite a thu om lo pi-in kikaimang ta ahi ziehin tami munah bang bawl ding ka hei? TOPA in ci hi. A makaite uh a awng vapuoh vua, sunthapai-in ka min kigensie den hi.

⁶Tua ahi ziehin ka mite in keima’ min thei ding uhi; tua ziehin thu gen pa keima ka hi a, khum ni ciengin tam muna ka op lam amate in ei thei ding uhi.

⁷Kilemna thu a phuongzah, lungdamna thu a puoh, hutdamna thu a tangko, Zion tungah, “Na Pasien maang hi,” ci-a muolte tungah thu a gen, kamtaipa’ keng khu bangza tahin etlawm ahei.

⁸Ngai un! na galvilte un a aw uh sangsah a, lungdam tahin amate in la a saton uhi; bangzieh ahei cile Zion ah TOPA a kilekiana amate in a mit utawh a mu uhi.

⁹A kisie no Jerusalem munte aw, la sa-in kiko ton un; azieh pen TOPA in a mite henem zo a, ama in Jerusalem tankhie zo hi.

¹⁰Minam zosie’ muna-ah TOPA in a ban siengtho lah zo a, leimongte zosie in i Pasien’ hutdamna a mu ding uhi.

¹¹Kihem un, kihem un. Khum mun panin pei dawh ta un! TOPA’ umlebeel a puote aw, a sieng lo nate khoi sih un; khum mun panin pei dawh unlen, no le no kisiensuo tawm un.

¹²Bangzieh ahei cile na mai vuah TOPA ang pei-in, Israel’ Pasien pen note’ nuadal ding ahi ziehin, a kinawsa-in pei loin, lauthawngsa-in zong na pei sih ding uhi.

¹³En un, ka nasempa a daupei ding hi; ama kitawi sangin kidomto ding a, a sang mama ding hi.

¹⁴Ama[146] lamdang a sa mi tampi a op ma bangin, a meelpuoh dan pen mi zong sun nawn loin a meel kisiegawp a, mihing bang nawn loin a guong zong kisie hi.

¹⁵Tuaci’n ama in minam tampite a dipkuosah[147] ding hi; ama ziehin kumpite in a kam a hum ding uhi; bangzieh ahei cile amate in a kigen ngai lo nate a mu ding vua, a zah ngai nai lo uh nate a lungngai ding uhi,” a ci hi.