Read Zou ISAIAH 53 Bible Online

ISAIAH 53 - Zou bible

ISAIAH 53

¹I zah uh thute koi in um ahei? TOPA’ banhat khu koi tungah kilang ahei?

²Azieh pen ama singno dawng khat bang le lei gaw lahah hui a hla singzung bangin ama mai-ah ang khangdawh hi; eite’ et dingin ama in guong kilawm le thupina nei lo a, eite’ ipla thei dingin zong ama in melhoina bangma nei lo hi.

³Midangte in ama simmaw-in a nuol uhi; gimna a thuoh mipa[148] le natna tawh kilawi lo pa ahi hi; tuale mite in mu nuom loin midangte in a mai [149]uh a humsan mipa bangin ama kisimmaw a, eite in zong bangma-in i sim sih hi.

⁴Ama in eite’ gimna teng thuoh a, eite’ natna teng a puo tahtah hi; hinanle Pasien in ama sat a, gimsah hi, ci-in eite in i ngaisun hi.

⁵Ahi vangin eite’ tatsietna ziehin ama in liemna thuoh a, eite’ khielna ziehin ama kitehpuong hi; eite in nopna i nga thei nadingin ama in dan thuoh a, ama’ liemmate ziehin eite in damna i nga uhi.

⁶I unpi-un tuu bangin lam i khiel sieng ta uhi; i unpi-un i lampi cietah i kipei ta vua, tuale TOPA in eite’ khielna zosie, ama tungah a nga ta hi.

⁷Ama kibawlsie-in gimna kithuohsah nanle a kam a kah vawt sih hi. Gaw dinga kipeipi tuuno le a mulheute’ mai-a kipeipi a ham lo tuu bangin ama in a kam a keh sih hi.

⁸A man lo thukhenna tawh ama a kikaimang hi. Koi in ama’ mailam ding ngaituo pieh thei ding ahei? Azieh pen a hingte’ gam panin ama kisumaimangin, ka mite’ thupalsatna ziehin ama in gimna a thuoh hi.

⁹Ama tatsie loin a kamah zuou thu om sih nanle, amate in migilote tawh hankhuh a kibang, mihaute[150] tawh a kibangin han[151] a bawlpieh uhi.

¹⁰Ahi vangin ama gimna[152] tawh a kitepuong ding pen TOPA’ deina ahi hi. Mawna zieha biehna-in[153] ama’ hinna na pieh ciengin, ama in a suonlehlahte mu ding a, tuale ama a damsawt ding hi; ama tungtawnin TOPA’ deina a lawcing ding hi.

¹¹Ama in lungkhamna panin khuovah[154] a mu ding hi; a theina tungtawnin ama in lungkimna mu ding hi. Midih[155] ka nasempa in mi tampi dihsah ding a, amau’ khielnate ama in puo ding hi.

¹²Tua ahi ziehin miliente tawh ama tanh ka hawmpieh ding a, ama in a thahat mite tawh galvan lahte a hawm ding hi; azieh pen ama in sina sungah a hinna sungsuh a, mi tawnkhielte tawh kisimtha hi; hinanle ama in mi tampite’ mawna puohpieh a, mi tawnkhielte adingin a thumpieh hi.