Read Zou ISAIAH 54 Bible Online

ISAIAH 54 - Zou bible

ISAIAH 54

¹Ta a nei lo, a ciing nu aw, la sa in; nausuoh natna a thuoh ngai lo nu aw, la sa-in awng vapo in! Azieh pen pasal nei numei’ tate sangin a kinuasie numei’ tate tamzaw ding hi, TOPA in ci hi.

²Na buhmun khan inlen, na tenna puonbuhte kizalsah in.; na khaute nua ziel sin; na khaute sausah inlen, na khuomte phutdet in.

³Azieh pen veilam le ziet lamah na kithezah ding vua, na suonlehlahte in minamte’ gou luo-in, a kilawi khuopite-ah a teng ding uhi.

⁴Zau sin, azieh pen maizumna na thuoh sih ding hi; lungkie sin, azieh pen zakona na thuoh sih ding hi; bang ding ahei cile na khangno lai-a na maizumna na mangngil ding a, meigong na hi zieha ang kizakona na phawh kha nawn sih ding hi.

⁵Azieh pen ang siempa na pasal ahi a, ama’ min Vanglien TOPA ahi hi; nangma ang tankhie pa pen Israel-te’ Siengtho Pa ahi a, ama pen leitung buppi’ Pasien kici hi.

⁶Bangzieh ahei cile a kidon lo, a lungkham vangut, tangval’ zi ahisa, a kikhul zi a kihlatkia bangin TOPA in nangma ang hlankia hi, na Pasien in ci hi.

⁷Bakhat sung kang nuasie zuai a, ahi vangin lainatna lienpi tawh kang khawmkia ding hi.

⁸Tui banga a let ka lungthahna ziehin na kung panin bakhat sung ka mai ka phuol a, ahi vangin kumtawn itna tawh na tungah lainatna kang nei ding hi, nang ang Tanpa TOPA in ci hi.

⁹Tam pen kei adingin Noah’ hun lai bang ahi hi: Leitungah Noah’ tuite ang peikia nawn lo ding, ci-a ka kiciem ma bangin na tungah lungthah nawn loin, kang phawhsie nawn sih ding hi, ci-in ka kiciem zo hi.

¹⁰Azieh pen muol sangte kihemin, muol neute kikhin thei hi, ahi vangin nangma kung panin ka itna kip kihem lo ding a, ka kilemna thuciem kikhin lo ding hi, nang tunga lainatna a nei TOPA in ci hi.

¹¹Gimna a thuoh, huipi’ sema a awnsa, ang kihenem lo khuopi aw, keima in suongkang vuite tawh na suongte ka lam ding a, na inn khuombulte zong sappphire[156] suong tawh ka phut ding hi.

¹²Na inn khumvumte ruby suongte tawh, na kul kotpite, jewel suonghoite tawh, na kulpi bangte zong suong manphate tawh ka bawl ding hi.

¹³Na tapate uh a unpi-in TOPA in hil ding a, na tapate uh a hau mama ding uhi.

¹⁴Dihna sungah nang ang kikipsah ding hi; nang na zau lo ziehin bawlsietna tawh na kigamla ding hi, nang na zau sih ding a, dipkuotna tawh na kigamla ding hi; azieh pen na kungah tuate ang tung lo ding hi.

¹⁵Mi khatpo in kitawhmawna a bawl leh tua pen keima kung pan hi lo hi. Note tawh kitawhmawna a bawl poma note ziehin a pua ding hi.

¹⁶En un, ama’ nasep nadingin pum zapin, hiem a bawl siekhengpa khu keima’ piensah ahi hi; keima in a susie dingin a susie pa zong ka piengsah hi.

¹⁷Nang do nadinga kibawl hiem poma mavang lo ding a, thukhenna sungah na langa a pang leii poma na thalpaih ding hi. Tam pen TOPA’ nasemte’ gouluo le kei kung pan amau’ dihna kilahna ahi hi, TOPA in ci hi,” a ci hi.