Read Zou ISAIAH 56 Bible Online

ISAIAH 56 - Zou bible

ISAIAH 56

¹TOPA in tam bangin ci hi: thutang zang unlen, thumanin gamta un, azieh pen ka hutdamna ang tungbai ta ding a, ka hutkhietna ang kilang ta ding hi.

²Tam banga a gamta mite, tami thu a tukip mite, sabbath buasah loin tangin, sietna khatpo bawl nading panin a kideh zo mite pen mi nuomsa ahi hi.

³TOPA a bel gamdang mipa in, “TOPA in a mite panin kei ei khenkhie tahtah ding hi,” ci sih heh; Cilgesa pasal in, “Kei pen singgaw khat ka hi lel hi,” ci sih heh.

⁴Bangzieh ahei cile TOPA in tam bangin ci hi: Ka sabbath nite tangin ei lungdamsah thei nate teel a, ka thuciemna a tukip a kiget mite tungah,

⁵ka innsung le ka kulpi sunga tanu le tapate sanga a hoizaw phawna le min ka pie ding a, amate tungah suhmaimang nawn lo ding, a kip tawntung min ka pie ding hi.

⁶Ama’ na a sem ding, TOPA’ min a it ding, ama’ nasem a suoh dingin TOPA a bel gamdang mite, sabbath ni tangin a buasah lo, ka thuciemna a tukip mi zosie

⁷ka muol siengtho-ah peipi-in ka thungetna inn sungah ka lungdamsah ding hi; keima in ka maitam tungah a meihal biehna ule a biehpiehnate uh kisang ding hi; azieh pen ka inn in mi namcin’ thungetna inn kici ding hi.

⁸A kipampaih Israel a kaikhawm TOPA Pasien in tam bangin ci hi. A kikaikhawmsa mite[157] banah amate kungah midangte ka kaikhawm ding hi, a ci hi.

⁹No gamsa zosie, gamlaha gamsa zosie, a valtum dingin hing pei un!

¹⁰Israel’[158] galvilte a mit uh taw a, a unpi-un theina a nei sih uhi. Amate a unpi-un mi a kawh thei lo ui tawh a kibang vua, a lup kawmun mang a nei vua, kimut a du mama uhi.

¹¹Uite in zong an a hai vua, kham hun a nei ngai sih uhi; tuucingte in theitelna nei loin, a unpi-un a lampi ciet vuah a kihei uhi; amate in a unpi-un a phattuom nading beh uh a sui uhi.

¹²Amate in, “Hing pei un, eite in[159] zu sui vai; eite in khamtahin zucia dawn vai. Zing cieng zong tuni ang bang ding a, nuomzaw lai ding hi,” a ci uhi.