Read Zou ISAIAH 57 Bible Online

ISAIAH 57 - Zou bible

ISAIAH 57

¹Mi thuman pa mangthai a, koima in ngaisutin nei lo hi; koima’ thei lo kalin a thutah mite kilamang hi. Azieh pen tuosietna panin midihte kilakhie a,

²amate nopsahna sungah lut uhi; thutanga kalsuonte ahi uleh amau’ lupna tungah a tawlnga ding uhi.

³Hizongle no aisan numeite’ tate, angkawmte le a pahtatte’[160] suonlehlahte aw, tam sungah hing pei un.

⁴Na simmaw uh koi hi a, koi langah na kam uh golkahin na leii uh phen na hi uh ahei? Note mi tawnkhielte’ tate, zuouphuohte’ suonlehlahte hi lo na hi uh amah?

⁵Gangpi sing lah le singna dum nei lahah a huasante’ kuom sung teng le suongpikawm tengah na tate uh a thatte hi lo na hi uh amah?

⁶Kuom sunga suong zolte lahah na tanh uh om a, tuate khu note’ tanh ahi hi; note in tuate tungah dawnthei biehna sungin an tawh biehna na tawi uhi. Tam silte ziehin kei ka lung a kim ding amah?

⁷Muolsang tungah na lupna na koi vua, a kithoi dingin tua munah na kato uhi.

⁸Kotpi le kotpi khuom nua lamah na dawi biehna lim na suong uhi; azieh pen nang in kei ei nuasie-in[161] na lupna na hawhkhie a, nangma tua tungah kato-in na lupna a golpi-in na hong hi; amate tawh thukimna bawlin, nang in a lupna uh na lunggul a, a guohtanga[162] a om amate na kaihlit hi.

⁹Sathau kengin Molech[163] kungah na haw a, na panamtuite na tamsah semsem hi; gamlapi-ah na palaite na sawl a, Misikhuo nangawnah na sawl hi.

¹⁰Na khuolzinna a tam ziehin nang na gim mama a, ahi vangin nang in, “Kimanna nei sih,” na ci sih hi. A kikuontawkia na lunggulna na mu a, nang na thazawm ta sih hi.

¹¹Koi na giin ziehin zuouthu genin kei ei phawh kha lo na hei? Ahi sihle na lungsim sungah ei ngaisun ta lo na mah? Ka mit singin ka dai dide zieha kei nei giin tah lo amah?[164]

¹²Na dihna le na sepnate kang genpieh ding a, ahi vangin tamte in nang ang hu zo sih ding hi.

¹³Na kiko ciengin na milim kholte kihunsah in! Ahui in amate mutmangin husan khat in tuate semmang ding hi. Hinanle kei ei bel tapo in leitang nei ding a, ka muol siengtho zong a luo ding hi.

¹⁴“Zih un, zih un, lampi bawl un; ka mite’ lampi a khahtan thei ding na zosie hemdawh un,” kici ding hi.

¹⁵Azieh pen a sang le a kitawisang, tawntung muna a teng pa, ama’ min Siengtho a kici pa in tam bangin ci hi: Mun sang le mun siengtho-ah ka teng a, a kiniemkhieh mite’ lungsim le a kisiakia mite’ lungsim a thakhausah dingin kisiakiana lungsim le kiniemkhiehna lungsim neite tawh keima ka omton hi.

¹⁶Azieh pen amate ka mawsiet zing sih ding a, zong ka lungthah zing sih ding hi; azieh pen ka mai-ah mihing lungsim gim ding a, keima siemsa hinna nangawn a gim ding hi.

¹⁷A gitlo huoihamna ziehin ka lung a thah hi; amate vuo-in ka kiphuol a, ka thang a pai hi; hinanle a lunglam ciet vuah a kihei lai veve uhi.

¹⁸A lampite uh ka mu zo a, hinanle ka damsah ding hi; Keima in amate pui-in henepna tawh ka thuhkia ding a, a kapte adingin a kam gimman uh ka siempieh ding hi.[165]

¹⁹Nopsahna, nopsahna, a gamla le a nai mite tungah om taheh; keima in amate ka damsah ding hi, TOPA in ci hi.

²⁰Hinanle migilote pen a khawl thei lo tuipi tawh kibang a, a tuite in buon le buathahte a lamto uhi.

²¹Ka Pasien in migilote adingin lungnopna om lo hi, ci hi.