Read Zou ISAIAH 59 Bible Online

ISAIAH 59 - Zou bible

ISAIAH 59

¹En un, a hundam zo lo dingin TOPA’ khut tom seng lo a, khuo a za thei lo dingin a bil zong bing lo hi.

²Hinanle na khielna uh pen noma le na Pasien uh kikalah kikhenna suoh a, ama in a zah lo nadingin na mawnate un ama’ maitang a lie hi.

³Azieh pen sisan in na khut uh buasah a, na khutmete uzong khielna tawh bua hi; na kam un zuou thu gen a, na leii un gitlona thu a gen hi.

⁴Thutang tawh koima in mi heh ngai lo a, citah tahin koima thukhen zumah pei lo hi; amate, bangma lo thusunnate tungah kinga-in zuouthu a gen vua, amate in nau bangin hahsatna paai-in mawna a suoh khie hi.

⁵Amate in gul guneite opin a keusah vua, mom khau puonin a gan uhi; a tui a nekha poma si a, a kitawkeh a tui panin muoltan no khat a keu hi.

⁶A momkhaute uh puonin kizang thei lo hi; silbawlte utawh a kikhu thei sih uhi. A nasep uh pen gitlo nasep hi a, a khut sung vuah tatsietna om hi.

⁷Sietna lamah a keng uh tai a, mawpeng mite sisan suo ding kinaw mama uhi; a ngaisutnate uh gitlo ngaisutna hi a, a lamlienpite vuah sietna le manthaina om hi.

⁸Lungmuonna lampi a thei sih vua, a lampite vuah thutang om lo hi. Amate in a lampite uh a kawi-in a bawl uhi; tua sunga peite koima in lungmuonna mu lo hi.

⁹Tua ziehin eite tawh thutang kigamla a, thudih in eite ei ban lo hi; eite in khuovah i ngah vua, ngai un! khuomiel a om hi; eite in a vah i ngah vua, hizongle miel lam i zawt uhi.

¹⁰Mittaw bangin kawm i zawt a, mit nei lote bangin i kimaitawm uhi; khuomut pat lam pei bangin suntang lai-in i kipai vua, mi hatte[167] lahah misi i bang uhi.

¹¹I unpi-un vompi bangin i hawh uhi; vahuite bangin i maumau uhi. Thutang i lamen vua, khat beh a om sih hi; hutdamna i lamen vua, eite tawh a kigamla hi.

¹²Azieh pen na masangah ka tatkhielna uh tam a, ka mawnate un ka lang khat vuah teci a pang hi. I tatkhielna uh eite tawh om a, eite in i mawnate i thei tahtah uhi:

¹³Eite tatkhielin TOPA i nuol a, Pasien i zuina uh pan i kiheimang ta uhi. Bawlsietna le ledona thu i gen vua, zuouthu vive ngaisunin i lungsim panun i gen uhi.

¹⁴Thutang kinuale a, thudih zong khu gamlapi-ah a ding ta hi; mipi kikhopna munah thutah a op lo ziehin thuman zong a tum thei ta sih hi.

¹⁵Thuman a kitasam a, sietna a pel mi poma kisuom gam hi. TOPA in tam thu mu a, thutang a op lo ziehin ama a lungkim sih hi.

¹⁶Ama in koima a op lo lam mu a, tuale a tang vua a ngetpieh ding koima a mu lo ciengin ama in lamdang a sa hi; tuaci’n ama’ khut in ama guolzawna ngasah a, ama’ dihna in ama a tukip hi.

¹⁷Ama in dihna khu awmdal bangin sil a, a lu tungah hutdamna sia lukhu khu hi. Ama in phulahna puonte songkholin sil a, puontuol sunga kituom bangin, lunghanna sungah ama kituom hi.

¹⁸A sepna utawh kituohin ama in thuhkia ding a, ama a langpang mite tungah a lungthahna tungsah ding hi; a galte tungah lethuh ding a, tuipi panga omte zong thuhkia ding hi.

¹⁹Tuaci’n nitumna lama mite in TOPA’ min a zatah ding vua, nisuona lama mite in zong ama’ vanglietna a zatah ding uhi. Bangzieh ahei cile TOPA’ hui in a semmang tuikhang bangin ama ang pei ding hi.

²⁰Tuale a khielna panun ang kilekia Jacob-te kungah Tanpa dingin Zion ah ang pei ding hi, TOPA in ci hi.

²¹Keima adingin tam pen amate tawh ka thuciemna ahi hi, TOPA in ci hi: Note’ tunga a om ka hlagau le na kam sung vua ka guonsa ka kammalte, na kam utawh kikhen lo ding a, ahi sihle na tate’ kam, a suonlehlahte’ kam tawh tu le kumtawnin kikhen lo ding hi, TOPA in ci hi.