Read Zou ISAIAH 60 Bible Online

ISAIAH 60 - Zou bible

ISAIAH 60

¹Tho inlen tang in; azieh pen na khuovah ang tung ta a, nangma tungah TOPA’ vang ang suoh zo hi.

²Azieh pen khuomiel in leitung tuom ding a, khuomu tawkhalpi in mite tuom ding hi; hizongle nang tungah TOPA ang suoh ding a, nang tungah ama’ vang ang kilang ding hi.

³Na khuovah sungah minamte ang pei ding a, na phalvah tang sungah kumpite ang pei ding hi.

⁴Khuodah inlen, na kimvel en in; a unpi-un kikhawmin na kungah ang pei uhi; a gamlapi panin na tapate uh ang pei ding a, naucingte in na tanute a kang vuah pomin puo ding uhi.

⁵Tua ciengin nang in mu-in na mai a taang ding hi; na lungtang kisai-in na lung a dam ding hi.[168] Azieh pen tuipi’ kicinna teng na kungah ang kipuoh ding a, minamte’ hauna teng zong na kungah ang tung ding hi.

⁶Midian-te le Ephah-te’ Kalaoh-note, kalaoh honpite in nang tuom ding uhi; Sheba gam sunga om zosie ang pei ding uhi. Amate in kham le panamtui ang puo ding vua, TOPA phatna a tangko ding uhi.

⁷Na kungah Kedar ganhon zosie ang kikhawm ding a, Nebaioth-a tuutang teng in nangma’ na sem ding uhi; ka maitam tungah biehna-in tua teng kisang ding a, keima in a minthang ka biehinn ka minthangsah semsem ding hi.

⁸Meiilum banga a leng kawikawite koi hi a, vakhu banga a tawlet vua a lengkhiete koi ahei?

⁹TOPA na Pasien uh’ min le Israel’ Siengtho Pa ziehin na tapate, a ngun a khamte utawh gamlapi panin a puoh dingin, tuikul gam mite in kei ei ngah ding a, Tarshish tembawte a masa ding uhi. Bangzieh ahei cile ama in nang ang minthangsah zo hi.

¹⁰Gamdang mite in na kulte cieng ding a, a kumpite un nangma’ na sem ding uhi; azieh pen ka lungthah zieha nang kang sat mawh vangin, kang angvanna ziehin na tungah khuotuona kang nei zo hi.

¹¹Minamte in a hauna uh ang puoh thei nadingin, a kumpite uh makai-in a guolguola ang lut nadingun na kotpite honsa-in om den ding a, sun le zanin tuate kikha lo ding hi.

¹²Azieh pen na na a sem lo minam le kumpi gamte mangthai ding a, tua minamte kisie maimang ding hi.

¹³Ka mun siengtho zep nadingin Lebanon thupina ahi taasan sing, hiengpa sing, taasingte, na kungah ang tung ding a, keima in ka keng ngahna mun ka minthangsah ding hi.

¹⁴Na mai-ah nang ang bawlsie mite’ suonlehlahte a kun kawmun hing pei-in, nangma ang simmawte zosie nangma’ kephang ang bawh ding uhi. Amate in nang pen TOPA’ khuopi, Israel-te’ Siengtho Pa’ Zion, ang ci ding uhi.

¹⁵Nang ang kinuasie, ang kimuda, koima nawh lo-a ang kikoisa na hi a, keima in a thupi zing dingin kang bawl ding a, a khang khanga kipahna dingin kang bawl ding hi.

¹⁶Nang in minamte’ nawi na tawp ding a, kumpite nawi zong na tawp ding hi; Keima TOPA, na Hundampa le na Tanpa, Jacob’ Vanglien Pa ka hi lam note in nei thei ding uhi.

¹⁷Sumngo tangin kham kang puoh ding a, sia tangin ngun kang peipi ding hi; sing tangin sumngo, suong tangin sia kang puoh ding hi. Na mangliente Kilemna ka hisah ding a, na nasem uhte Dihna ka hisah ding hi.

¹⁸Na gam sungah tatsietna kiza nawn lo ding a, na gamgi sungah sietna le suhsietna om nawn lo ding hi; nangma in na kulpite Hutdamna, na kotpite Phatna, na ci ding hi.

¹⁹Sun hunin ni pen na khuovah hi nawn lo ding a, zan hunin[169] hlapi vang in ang tan nawn sih ding hi; ahi vangin TOPA khu kumtawn na khuovah ahi a, tuale na Pasien zong khu na minthanna ahi ding hi.

²⁰Na ni tum nawn loin, na hlapi a mang nawn sih ding hi; azieh pen TOPA khu kumtawn na khuovah hi ding a, na dana kaana nite a tawp ta ding hi.

²¹Na mite a unpi-un midih hi ding a, amate in kumtawnin tua gam luo ding uhi. Amate pen ka minthan nadinga ka suon, a zung meng ka khutsuoh ahi uhi.

²²Mi tawmpen khat zong be khat ang hi ding a, a neupen khat zong minam thahat khat ang hi ding uhi; Keima TOPA ka hi hi; a hun a tun ciengin mallang tahin tam thu ka tangtun ding hi.