Read Zou ISAIAH 62 Bible Online

ISAIAH 62 - Zou bible

ISAIAH 62

¹Ama’ dihtanna thu phalvah bangin tangin, ama’ hutdamna thu meivah kuong a bah masangsie, Zion ka khuolna-in ka dai om sih ding a, Jerusalem ka khuolna-in ka mawh op sih ding hi.

²Minamte in na dihtanna a mu ding vua, kumpi zosie in zong na vanglietna a mu ding uhi; TOPA in ama’ kam tawh ang phuo ding min tha tawh nang ang kihlan ding hi.

³Nang pen TOPA’ khut sungah a melhoi lukhu na hi ding a, na Pasien’ khut sungah kumpi lukhu na hi ding hi.

⁴Nang pen a Kinuasiesa,[172] ang kici nawn sih ding a, na gam zong Gamkhing,[173] ang kici nawn sih ding hi; nang pen Ama Tunga Ka Lungkimna,[174] ang kici ding a, na gam zong a Kitenpi,[175] ang kici ding hi; azieh pen nang tungah TOPA lungkim a, na leitang zong mite in a kitenpi ding hi.

⁵Azieh pen tangval khat in ngahnu khat a kitenpi bangin note ang lampa[176] in zi-in ang nei ding a, monu tungah mopa a lungdam ma bangin nangma tungah zong na Pasien a lungdam ding hi.

⁶Jerusalem aw, na kulpite tungah galvilte ka koi zo ta hi; sun le zanin amate a sip ngai sih ding uhi. TOPA a phawhsahkia note zong mawh khawl sih unlen,

⁷ama in Jerusalem sukipin leitung muncin tengah a minthan nadinga a bawl masangin, ama mawh khawlsah sih un.

⁸A zietlam khut le a banhat tawh TOPA kiciem zo hi: Na galte’ an dingin na ante ka piekia nawn sih ding a, hanciem a na bawl lenggazu zong gamdang mite in a dawn sih ding uhi;

⁹ahi vangin an kholte in ne-in TOPA a phat ding vua, a kaikhawm mite in zong a siengtho ka huong sungah a dawn ding uhi.

¹⁰Pusuoh un, kotpite panin pusuoh un. mite adingin lampi siel un; zih un, lamlienpi zih un, suongte paidawh unlen, mite tungah lim khat khaito un.

¹¹Leimong dongah TOPA tangko zo hi: Zion’ tanu kungah, “En in, na hutdamna ang tung ta hi; ama in a thaman ang keng a, a mai-ah leiba sanna ding om hi,” ci un.

¹²Amate pen, “A Siengtho Mite, TOPA’ tatsa mite kici ding a, nang pen, “A Kimusa, A Kinuasie lo Khuopi, ang kici ding hi.