Read Zou ISAIAH 65 Bible Online

ISAIAH 65 - Zou bible

ISAIAH 65

¹Kei ei kan lote sui dingin a baisa-in ka om a, kei ei sui lote mu dingin a baisa-in ka om hi. Ka min tawh ei hlan kha lo minam khat kungah, “Kei tanah om ing, kei tanah om ing,” ka ci hi.

²Amau’ dei bang zui-a lampi hoi lo a zuite le a ledo mite tungah sun tungtawnin ka khut ka zah hi.

³Ka maitangah a tawntunga kei ei phin zing mite, um sungah kithoina bawlin, tehlei tungah panamtui a hal hi;

⁴hankhuh sungah to-in munsip tenga a gieh mite; vohsa ne a, a beel sungah a kidahhuoi sa metui a koite;

⁵“Nang adingin siengtho luo ka hi ziehin, nangma tangin om in, ka kung ei nai sin,” a ci mite ahi uhi. Tua bang mite pen ka nahkuo vanga meikhu le sun tawntunga a kuong den mei tawh a kibang uhi.

⁶En in, ka mai-ah gielsa-in om hi: Ka dai op sih ding a, ka thuhkia ding hi; a kicing tahin ka thuhkia valon ding hi.

⁷A kang sung vuah amau’[184] khielnate le amau’[185] pu le pate khielnate ka thuhton tahtah ding hi, TOPA in ci hi; azieh pen amate in muol tungah panamtui a hal vua, muol tang teng tungah zong keima ei gensie uhi. Amau’ gamtatna ziehin amau’ sepsa thaman a cingin a kang sung vuah te-in ka thuh ding hi.

⁸TOPA in tam bangin ci hi: A bawh pan lenggazu kinga a, amate in, “Tuate sungah thupha om ahi ziehin susie vawt sih un,’ a ci ma bangun, ke’n zong ka nasemte khuolna-in tam bangin ka bawl ding a, a unpi-un ka susie sih ding hi.

⁹Keima in Jacob panin suonlehlahte[186] ka piengsah ding a, Judah panin ka muol a luo dingte[187] ka piengsah ding hi; ka teeltuomte in tuate a luo ding vua, tua munah ka nasemte a teng ding uhi.

¹⁰Keima ei sui ka mite dingin Sharon pen tuuhonte gamtatna mun suoh ding a, Akhor Kuom zong bawnghonte kuolna mun a suoh ding hi.

¹¹Hinanle TOPA a taisan mite, ka muol siengtho a mangngil mite, Kam-etna-in sabuoi pha a, Sekholna adinga zu a kihalsa hai sunga a sung note pen,

¹²namsau tawh a si dingin kang sekhol ding a, ang that dingte mai-ah na unpi-un na kun sieng ding uhi; azieh pen kang hlat lai-in nei dawng nuom sih vua, kang hopi lai-in na ngai nuom sih uhi. Ka muna-ah note in a sie bawlin ka dei lo nate na teel uhi.

¹³Tua ahi ziehin TOPA Pasien in tam bangin ci hi: Ka nasemte in a ne ding vua, hizongle note na gilkiel ding uhi; ka nasemte in a dawn ding vua, hizongle note na dangta ding uhi; ka nasemte a kipah ding vua, hizongle note na maizum ding uhi;

¹⁴ka nasemte in lungdamin la sa ding a, hinanle lungtang na-in na kap ding vua, na lungsim uh a gim ziehin na tau vangut ding uhi.

¹⁵Awsie lawna-a zah dingin ka teeltuom mite tungah na min uh na nuasie ding vua, TOPA Pasien in note ang that ding hi; hinanle ama in a nasemte tungah min dang khat a phuopieh ding hi.

¹⁶Tua ciengin leitunga thupha a pie poma in a thuman Pasien suongin thupha pie ding a, gam sunga kiciemna nei poma in a thuman Pasien suongin kiciem ding hi; Azieh pen nidang lai-a buoinate kimangngil zo ta a, keima muna-ah kiphuolmang zo ta hi.

¹⁷Azieh pen keima in vantha le leitha ka siem ta ding hi; nidang lai thute kiciemte nawn loin, zong kiphawhkha nawn lo ding hi.

¹⁸Hinanle ka siemsate sungah lungdam kipahin om zing un; azieh pen keima in kipah nadingin Jerusalem ka siem ding a, lungnop nadingin ama’ mite ka siem ding hi.

¹⁹Jerusalem sungah ka kipah ding a, ka mite sungah ka lungdam ding hi; tua sungah kaana awging le lunggimna awging kiza nawn lo ding hi.

²⁰Tua sungah nausen a ngehsi a om nawn sih ding a, a vuoisi lo ding upa zong a om sih ding hi; azieh pen kum zakhat a a si mite a khansi-in kingaisun ding a, kum za cing lo-a a si mite samsiet thuohin kingaisun ding hi.

²¹Amate in inn a lam ding vua, a sungah a teng ding uhi; amate in lengga um a bawl ding vua, a ga a ne ding uhi.

²²Midangte ten nadingin inn a lampieh sih ding uhi; midangte neh dingin lengga um a bawl sih ding uhi; azieh pen singkung khat’ hintan ma ka mite a hing ding vua, ka teeltuom mite in a khut utawh a sepsate nuomtahin sawtpi a ne ding uhi.

²³A mawhna-in na sem loin, lungkhamna[188] dingin zong tate a nei sih ding uhi; bangzieh ahei cile TOPA’ thupha pieh tate ahi ding vua, amau’ suonlehlahte zong tua bang ma ahi ding uhi.

²⁴Amate in ei hlat masangun keima in ka dawng ding a, amate in thu a gen laitahun ka bilin ka za ding hi.

²⁵Ngie le tuuno in an neton ding a, bawngtang bangin humpi in bukung a ne ding hi; ahi vangin leivui pen gulpi’ an hi ding hi! Ka muol siengthote tungah amate kiliemsah lo ding a, zong kisusie lo ding hi, TOPA in ci hi.