Read Zou SIEMPU LAIBU 1 Bible Online

SIEMPU LAIBU 1 - Zou bible

SIEMPU LAIBU 1

¹TOPA in Moses hlanin kikhopna buh panin tam bangin gen hi:

²Israel mite hopi inlen tam bangin gen in: Note khatpo in TOPA tungah ganhing biehna na lui ciengun bawnghon pan ahi sihle tuuhon pan hi ding hi.

³Tua biehna khu bawnghon pana meihal biehna ahile, genbaang lo apa khat na pie ding hi; TOPA mai-ah tua biehna nangma tanga ang kisanpieh thei nadingin kikhopna buh tunkotah na peipi ding hi.

⁴Meihal biehna ganhing lu tungah na khut na ngam ding a, tua khu nangma adingin thoidamna-in kisang ding hi.

⁵TOPA mai-ah tua bawngtang kigo ding a, Aaron’ suon siempute in tua gansi peipi-in kikhopna buh tunkota om maitam ning li tengah the ding uhi.

⁶Tua ciengin meihal biehna ganhing a vun hawhin kisemnen ding hi.

⁷Siempu Aaron’ tate in maitam tungah meitaw-in mei tungah sing bop ding uhi.

⁸Aaron’ suon siempute in a sanente le a lutang le a thaute maitam’ mei sing tungah koi ding uhi;

⁹ahi vangin a sungkuote le a kengte tui tawh sawp sieng ding uhi. Tua ciengin siempu pa in meihal biehna dingin tua teng a unpi-in maitam tungah haltum ding hi. Tua khu TOPA dinga a namtui meihal biehna ahi hi.

¹⁰Meihal biehna dinga na zah letsong pen tuu ahi a, keel ahi zongin a hon lah pan ahile genbaang lo apa khat hi ding hi.

¹¹TOPA mai maitam sahlam pangah tua gan kigo ding a, Aaron’ suon siempute in maitam ning li tengah gansi the ding uhi.

¹²A sate kisemnen ding a, siempu pa in maitam meitunga om sing tungah a lutang le a thaute tawh a koiton ding hi;

¹³ahi vangin a sungkuo le a kengte tui tawh kisawp sieng ding hi. Tua ciengin siempu pa in a unpi-in pie-in maitam tungah haltum ding hi. Tuami khu meihal biehna ahi a, TOPA in namtui a sah mei tawh kihal biehna ahi hi.

¹⁴TOPA tungah na lui uh biehna pen vate tawh meihal biehna ahile vakhu ahi sihle paalva khat zawzaw na teel ding hi.

¹⁵Maitam-ah siempu pa peipi-in a lu hiatawng ding a, maitam tungah hal ding hi. Tua maitam pangah a si tasah ding hi.

¹⁶Ama in a tangkhai le a sunga om teng[1] ladawhin maitam nisuona lam vutbuohna munah paikhie ding hi.

¹⁷A hlakui gel panin balkeh ding a, hinanle a hiatawng sih ding hi. Tua ciengin siempu pa in mei tunga om sing tung, maitam tungah haltum ding hi; tua khu meihal biehna ahi a, TOPA in namtui a sah mei tawh kihal biehna ahi hi.